Եղեգնուտցիները չեն կարողանում իրենց բերքն իրացնել սուպերմարկետներում. գյուղը փաստացի համայնքի ղեկավար չունի
Արմավիրի մարզի Եղեգնուտ համայնքի գյուղատնտեսությամբ զբաղվող բնակիչները բերքն իրացնելու լուրջ դժվարությունների առաջ են կանգնել: Չեն կարողանում համայնքապետարանից տեղեկանք վերցնել, որպեսզի կարողանան սմբուկը և այլ գյուղմթերքներ իրացնել սուպերմարկետներում:
Օֆիկ Գալստյանն այսօր համագյուղացիների հետ բողոքի ակցիա էր իրականացնում Եղեգնուտի համայնքապետարանի դիմաց՝ պահանջելով, որպեսզի մարզպետ Համբարձումյանը գա գյուղ և զրուցի գյուղացիների հետ: Նա պատմեց, որ պայմանագիր ունեն «Երևան Սիթի» սուպերմարկետի հետ, որով սմբուկ են մատակարարում սուպերմարկետի «Փակ շուկայի» մասնաճյուղին:
Քանի որ այս պահին եղեգնուտցիները փաստացի համայնքի ղեկավար չունեն, չեն կարողանում համայնքապետարանից գյուղմթերքի վերաբերյալ տեղեկանք վերցնել, որպեսզի կարողանան այն վաճառել սուպերմարկետին:
«Հետք»-ն ավելի վաղ գրել է, որ Եղեգնուտում պարբերաբար բողոքի ակցիաներ են իրականացվում, ինչի հետևանքով կաթվածահար է եղել գյուղի ղեկավարումը: Այսօր նույնպես այդ օրերից մեկն էր: Վաղ առավոտից գյուղացիները պահանջում են համայնքը երկու տասնյակից ավել ղեկավարած Ռազմիկ Մարգարյանին չվերադարձնել իր նախկին պաշտոնին:
Երկրում իշխանափոխությունից հետո, գյուղի բնակիչների ճնշման ազդեցության տակ, Եղեգնուտ համայնքի ղեկավար Ռազմիկ Մարգարյանը լիազորությունները վաղաժամկետ դադարեցնելու դիմում էր գրել, ինչը չէր ընդունվել համայնքի ավագանու կողմից: Արմավիրի նախկին մարզպետ Գագիկ Միրիջանյանը Եղեգնուտում նշանակել էր համայնքապետի ժամանակավոր պաշտոնակատար:
Արմավիրի ներկայիս մարզպետ Համբարձում Մաթևոսյանը հունիսի 22-ին անվավեր է ճանաչել Եղեգնուտ համայնքի ղեկավարի ժամանակավոր պաշտոնակատար նշանակելու մասին նախորդ մարզպետ Գագիկ Միրիջանյանի՝ 2018թ. օգոստոսի 24-ին ստորագրած թիվ 287 որոշումը: Հ. Մաթևոսյանի որոշման հիմք էր հանդիսացել Վարչական դատարանի որոշումը:
Ռազմիկ Մարգարյանն ընդդեմ մարզպետի դիմել էր դատարան և դատարանը Արմավիրի մարզի Եղեգնուտ համայնքի ղեկավար Ռ. Մարգարյանին վերականգնել է համայնքի ղեկավարի պաշտոնում՝ անվավեր ճանաչելով Եղեգնուտում համայնքի ղեկավարի ժամանակավոր պաշտոնակատար նշանակելու մասին նախկին մարզպետի որոշումը:
Սմբուկով բեռնված մի ավտոմեքենա այսօր եկել էր բողոքի ակցիայի վայր և մարդկանց ցույց տալիս իրենց փաստացի վիճակը:
Նշենք, որ Ռազմիկ Մարգարյանը դատարանի որոշումից հետո դեռ չի եկել համայնքապետարան, իսկ հունիսի 22-ից լիազորությունները դադարեցված համայնքի ժամանակավոր պաշտոնակատար Ռազմիկ Մկրտչյանը, ով համագյուղացիների հետ բողոքի ակցիային էր մասնակցում, նշեց, որ գյուղացիները հայտնվել են անելանելի վիճակում:
«Որպեսզի «Սիթին» ընդունի գյուղացու ապրանքը, մենք տալիս էինք տեղեկանք, որ այդ մարդն ունի այսքան հող և մշակում է այսինչ կուլտուրան, դրանից հետո նոր միայն ընդունում են: Բայց իմ լիազորությունները դադարեցված է, ես չեմ կարող նման փաստաթուղթ տալ: Գյուղի 90 %-ը հայտնվել է նույն վիճակում»,- ասաց Ռազմիկ Մկրտչյանը:
Համայնքի ղեկավարի արդեն նախկին ժամանակավոր պաշտոնակատարը հավելեց, որ ավտոմեքենաների տեխնիկական զնման համար ևս դժվարություններ են առաջացել: Գյուղացիները չեն կարողանում ավտոմեքենայի գույքահարկի «զրոյական» տեղեկանքներ վերցնել:
Գյուղմթերքի արտահանությամբ զբաղվող եղեգնուտցի Հովհաննես Հակոբյանն էլ փաստեց, որ գյուղի արտահանողները ևս վատ վիճակում են հայտնվել: Նրանց ևս տրվում է համայնքապետի կողմից տեղեկանք, որից հետո միայն կարողանում են հատել սահմանը: Այս օրերին, գյուղից որևէ մեկը չի կարողանում բերք արտահանել:
Թե որքան է շարունակվելու եղեգնուտցիների բողոքի ակցիան՝ դժվար է ասել:
Մեկնաբանել