ԱԺ նախագահը վստահեցնում է` մեկուսացման ցուցում ստացած բոլոր պատգամավորները մեկուսացած են
«Իմ քայլը» խմբակցության պատգամավորների նախաձեռնությամբ խորհրդարանը հրավիրել է արտահերթ նիստ:
«Լուսավոր Հայաստան» խմբակցության քարտուղար Գևորգ Գորգիսյանը, դիմելով արտահերթ նիստի օրակարգի զեկուցող Սիսակ Գաբրիելյանին, ասաց, որ «Իմ քայլի» պատգամավորների մի մասը վարակված է, մեկ այլ մասը` մեկուսացած, ու այս պայմաններում իրենք նիստ են հրավիրել:
«էստեղ հավաքվել ենք քննարկելու նախագծեր, որոնց հրատապությունը հասկանալի չէ, առնվազն 90 տոկոսը սեպտեմբերին կարելի էր հանգիստ քննարկել»,- ասաց նա:
Գաբրիելյանը նախագծերի ոչ հրատապությանը չհամաձայնեց` ասելով, որ խորհրդարանը դեռևս արձակուրդում չէ: Ինչ վերաբերում է այն դիտարկմանը, որ մեկուսացած պատգամավորներ են եկել նիստին, Գաբրիելյանն ասաց, որ եթե նման տեղեկություն ունի, ապա պետք է անունները հանրայնացնի:
ԱԺ նախագահ Արարատ Միրզոյանը արձագանքեց` բոլոր այն պատգամավորները, որոնք մեկուսացման ռեժիմում են, մեկուսացած են, այն պատգամավորները, որոնք արդեն բուժվել են, ինչպես Կարինե Պողոսյանը, մասնակցում են նիստին:
«Բարգավաճ Հայաստան» խմբակցության պատգամավոր Նաիրա Զոհրաբյանը հետաքրքրվեց, թե ինչ է լինելու այն նախագծի հետ, որով առաջարկվում էր դիմակներ չդնելու համար տուգանքը բարձրացնել: Սիսակ Գաբրելյանն ասաց` այն այս պահին շրջանառությունից հանված է, սակայն չբացառեց, որ որևէ պատգամավոր կրկին նման նախագիծ ներկայացնի:
Այնուհետև օրակարգը հաստատվեց:
Մեկնաբանել