Հունիսին, կորոնավիրուսի համավարակի ֆոնին, Ռուսաստանում մահացության ցուցանիշներն էականորեն աճել են, ինչը պարզ է դառնում որոշ շրջանների քաղաքացիական կացության ակտերի գրանցման գործակալությունների հրապարակած վիճակագրությունից։ 

«Meduza»-ն գրում է, որ մեկ միլիոն և ավելի բնակչություն ունեցող քաղաքներով վարչական միավորներից, տվյալները հրապարակել են Նովոսիբիրսկի և Սվերդլովսկի մարզերը, ինչպես նաև Սանկտ Պերետբուրգը։ Վիճակագրությունից պարզ է դառնում, որ, համեմատած 2019 թվականի հունիսի, ամենուր մահացության ցուցանիշներն աճել են 10 %-ով։ Այսպես, Նովոսիբիրսկի մարզում մեկ ամսվա ընթացքում մահացել է 3 606 մարդ, այն դեպքում, երբ 2019 թվականի նույն ժամանակահատվածում մահացել է 2 711-ը (33 % աճ), Սվերդլովսկի մարզում մեկ ամսվա ընթացքում մահացել է 5 275 մարդ, այն դեպքում, երբ 2019 թվականի նույն ժամանակահատվածում մահացել է 4 341-ը (22 % աճ)։ Իսկ արդեն Սանկտ Պետերբուրգում 2020 թվականի հունիսին մահացել է 7 106 մարդ, ինչը 55 %-ով գերազանցում 2019 թվականի հունիս ամսվա ցուցանիշին։ Վերջին մեկ ամսվա ընթացքում Սանկտ Պետերբուրգում մահացության ցուցանիշները ռեկորդային են վերջին 10 տարիների համար։

Սանկտ Պետերբուրգի իշխանությունները հաստատել են, որ մահացության աճի պատճառը դարձել է հենց կորոնավիրուսը։ Առողջապահության հարցերով հանձնաժողովում նշել են, որ 2020 թվականի առաջին կիսամյակում քաղաքում մահացածների թիվը 3915-ով ավելին է, քան նախորդ տարի։ Կորոնավիրուսով հիվանդ 2 419-ի պացիենտների մահվան պատճառ է դարձել խրոնիկ այլ հիվանդության հետևանքները, իսկ անմիջապես COVID-19-ից մահացել է 1 281 մարդ։ 

Սանկտ Պետերբուրգի իշխանությունների տվյալներով՝ համավարակի գագաթնակետը քաղաքում եղել է մայիս ամսվա վերջին շաբաթը և հունիսի առաջին տասնօրյակը, այդ իսկ պատճառով հուլիսին մահացության ցուցանիշները պետք է նվազեն։ «Արդեն հիմա հոսպիտալացվածների թիվը վերապրոֆիլավորված բուժհաստատություններում կրճատվել է շուրջ 70 %-ով, ի տարբերություն համավարակի գագաթնակետի ցուցանիշների»,- նշել են առողջապահության հարցերով հանձնաժողովում։

«Открытые медиа» նախաձեռնության լրագրողները հաշվել են, որ 18 շրջաններում, որոնք հրապարակել են հունիս ամսվա մահացության ցուցանիշները, գումարային առումով մահացել է 8 583 մարդ ավելին, քան մեկ տարի առաջ։ Այսպիսով, մահացության ցուցանիշների աճը կազմել է շուրջ 30 %։

Լուսանկարը՝ Roman Pimenov / TASS