Հուլիսի 14-ի դրությամբ Ադրբեջանը թիրախավորել է Տավուշի մարզի Չինարի, Այգեպար, Ներքին Կարմիրաղբյուր, Պառավաքար սահմանամերձ համայնքները, իսկ Բերդ քաղաքը` հրետակոծության ենթարկել:

Այս մասին Իջևանում ստեղծված ճգնաժամային տեղեկատվական կենտրոնի մամուլի ասուլիսին ասաց կենտրոնի մամուլի պատասխանատու, Վազգեն Սարգսյանի անվան ռազմական համալսարանի հրամանատարաշտաբային ֆակուլտետի պետ Արծրուն Հովհաննիսյանը: Հովհաննիսյանի խոսքով` Բերդ քաղաքում երկու գործարան է թիրախավորվել, տարբեր տեսակի վնասներ են կրել վերոնշյալ համայնքները, վնասվել է նաև գազատարը:

«Թիրախավորվում է խաղաղ բնակչությունը, բարեբախտաբար զոհեր չունենք խաղաղ բնակչության շրջանում: Մեր զինված ուժերն իրենց առջև դրված մարտական խնդիրները հնարավոր բոլոր ձևերով կատարել են, հակառակորդին լռեցրել են»,- ասաց նա:

Ըստ Հովհաննիսյանի` Ադրբեջանը հրետանային միջոցներ, տանկեր, գրադ է կիրառել, նաև թիրախավորել իր խաղաղ բնակչությանը` բնակելի տների մերձակայքում տեղադրելով զրահատեխնիկա:

«Այժմ օպերատիվ իրավիճակը համեմատաբար հանգիստ է, ժամը 18:00-ից սկսած լարվածությունը նվազում է»,- ասաց նա:

Հովհաննիսյանը հայտնեց, որ կան նաև վիրավոր զինծառայողներ, նրանց կյանքին վտանգ չի սպառնում, միջին ծանրության վնասվածքներ են ստացել:

Հովհաննիսյանը չցանկացավ պատասխանել հարցին, թե արդյոք հակառակորդի կողմից զորամիավորումների տեղաշարժ, ուժերի կուտակում կա, թե ոչ, վստահեցնելով, որ զինված ուժերը բոլոր տեսակի զորաշարժերին տիրապետում են:

«Բայց կգերադասեի չխոսել այդ մասին, ցույց չտանք, թե իրականում ինչքան ենք տիրապետում ու չբացենք մեր խաղաքարտերը, թողնենք զինվորականները կոնկրետ գործողություններ կատարեն»,- ասաց նա:

Հովհաննիսյանը նաև նպատակահարմար չհամարեց խոսել դիրքային փոփոխության մասին, քանի որ դեռ մարտական գործողություններ են ընթանում: