Գեղարքունիքի մարզի Զոլաքար համայնքում ապամոնտաժված և յուրացված խողովակների գործով համայնքին պատճառված վնասը գնահատվել է 16 միլիոն 128 հազար դրամ։ Այս մասին մեր գրավոր հարցմանն ի պատասխան հայտնել է Քննչական կոմիտեի տարածքային քննչական վարչությունների գործունեության վերահսկողության գլխավոր վարչության պետ Սամսոն Մաթևոսյանը։

• Գեղարքունիքում 1.8 կմ խողովակ է անհետացել․ Զոլաքարի հողերն անջրդի են դարձել

Քրեական օրենսգրքի 177-րդ 3-րդ մասի 1-ին կետի՝ առանձնապես խոշոր չափերի գողության հատկանիշներով հարուցված քրեական գործով մինչ այս պահը մեղադրյալի կամ կասկածյալի դատավարական կարգավիճակ ունեցող անձ չկա։

Իսկ Զոլաքար համայնքի հողը համայնքապետ Արման Ղազարյանի եղբորը վաճառելու և նրա կողմից հեռահաղորդակցության օպերատորին վարձակալությամբ տրամադրելու վերաբերյալ մեր հրապարակումը ուսումնասիրվում է Գլխավոր դատախազությունում։ Այս մասին տեղեկացանք դատախազության հանրային կապերի բաժնից։

• Մանկապարտեզի հողն օտարվել է համայնքապետի եղբորը․ նա էլ վարձակալության է տվել «ՎիվաՍել-ՄՏՍ»-ին

«Հետք»-ը մայիսին գրել էր Զոլաքար համայնքի ոռոգման համակարգից 1.8 կիլոմետր երկարությամբ խողովակաշարի անհետացման մասին։ Գյուղացիների պնդմամբ, խողովակներն ապամոնտաժել և յուրացրել է գործող համայնքապետ Արման Ղազարյանը։ Համայնքի ղեկավարն էլ մեղքը բարդում է նախորդ համայնքապետի վրա։

Հունիսին էլ գրեցինք, որ համայնքի ղեկավարի եղբորն է օտարվել համայնքային հողը, որն էլ այն վարձակալության է տրամադրել կապի օպերատորին։ Այդ ամենի արդյունքում համայնքը զրկվել է լրացուցիչ եկամուտներ ստանալուց։