![](/static/articles/12/09/82/l-OaU4QbAzdB.jpg)
36 մարզային թանգարանների ու արգելոց-թանգարանների տրամադրվել է նյութատեխնիկական աջակցություն
Կրթության, գիտության, մշակույթի և սպորտի նախարարությունը հայտնում է, ԻԿՕՄ Հայաստանի և ՌՕՔԵՄՓ կենտրոնի հետ համատեղ կազմակերպել է թանգարանների և արգելոց-թանգարանների կարիքների գնահատում, որի հիման վրա ԱՄՆ ՄԶԳ «Իմ Հայաստան» նախաձեռնության շրջանակում մշակվել է ԿՈՎԻԴ-19-ի հետևանքների չեզոքացման ծրագիրը:
Նախաձեռնության առաջին փուլով «Իմ Հայաստան» ծրագրով ՀՀ Շիրակի, Լոռու, Տավուշի, Վայոց ձորի և Սյունիքի մարզերի 36 թանգարաններին ու արգելոց-թանգարաններին հատկացվել են տեխնիկական սարքավորումներ, հիգիենայի և անվտանգության պարագաներ, համավարակի օրերին այցելության պայմանների նշանների տպագրված պաստառներ:
Խաչատուր Աբովյանի տուն-թանգարանում այսօր տեղի է ունեցել ծրագրի նվիրատվության առաջին միջոցառումը, որին մասնակցել է ԿԳՄՍ նախարարի տեղակալ Նարինե Խաչատուրյանը: Նա շնորհավորել է ներկաներին
երկարատև դադարից հետո թանգարանների վերաբացման կապակցությամբ և խոսել համատեղ ծրագրի կարևորության մասին. «Շնորհակալ եմ բոլոր կազմակերպիչներին, որոնք ջանք չեն խնայել
ծրագիրը կյանքի կոչելու համար: Այս մոտեցումը և համագործակցությունը չափազանց կարևոր են:
Տրամադրվելիք նյութատեխնիկական աջակցությունը, որը կարևոր է նաև առողջապահական տեսանկյունից, կնպաստի վերաբացված թանգարաններում
աշխատանքների արդյունավետ կազմակերպմանը»,- ասել է Ն. Խաչատուրյանը:
ԱՄՆ ՄԶԳ «Իմ Հայաստան» ծրագրի ղեկավար Սիսակ Մխիթարյանն ընդգծել է, որ այս նախաձեռնությամբ նպատակ ունեն թանգարաններին օգնել հաղթահարել ԿՈՎԻԴ-19-ի առաջացրած խնդիրները և մարտահրավերները.
«Այս աջակցությամբ թանգարանները կկարողանան ապահով պայմաններ ստեղծել աշխատակիցների և այցելուների համար, աշխատել ավելի արդյունավետ՝ շարունակելով իրենց չափազանց կարևոր և արժեքավոր գործունեությունը»,- ասել է նա՝ շնորհակալություն հայտնելով ծրագրի բոլոր մասնակիցներին:
Ծրագրի առաջին փուլում աջակցություն ստացած մարզերի ընտրությունը պայմանավորված է «Իմ Հայաստան» ծրագրի գործունեության աշխարհագրությամբ, նախաձեռնությունը կրելու է շարունակական բնույթ:
Մեկնաբանել