![](/static/articles/12/10/78/l-BJOwDisOmG.jpg)
Մոսկվայի բոլոր ուսուցիչները կորոնավիրուսի թեստ են հանձնել
Մոսկվայի կրթական համակարգի բոլոր աշխատակիցները հանձնել են կորոնավիրուսի թեստ։ Այդ մասին հայտարարել է Մոսկվայի փոխքաղաքապետ Անաստասիա Ռակովան։ «Մոսկվայում, մինչ ուսումնական տարվա սկիզբը, թեստավորվել են կրթական համակարգի բոլոր աշխատակիցները։ Ավելի քան 180 հազար մարդ հանձնել է ՊՇՌ թեստ։ Թեստավորված անձանց 3 %-ի, այսինքն մոտ 5500 մարդու թեստերի պատասխանը եղել է դրական։ Նրանք բոլոր կլինեն բժիշկների հսկողության տակ և չեն ներկայանա աշխատանքի»,- նշել է Ռակովան։
Մոսկվայի փոխքաղաքապետը նաև պատմել է համավարակի պայմաններում դպրոցական աշխատանքի կազմակերպման մասին։ Բոլոր ուսումնական հաստատություններում պարբերաբար կիրականացվի ամբողջական մաքրություն և ախտահանում։ Դպրոցում առկա օդը կախտահանվի փակ բակտերիցիդ լամպերի միջոցով։ Մուտքի մոտ կչափվեն բոլոր աշակերտների ջերմությունը։ Բացի այդ, յուրաքանչյուր դպրոցում ստեղծվել է նաև անհատական պաշտպանիչ միջոցների պաշար։
Ուսուցիչներին խորհուրդ է տրվում կրել դիմակներ, սակայն նոր դասանյութի մատուցման ժամանակ, դրանք կթույլատրվի հանել։ Մանկավարժական մյուս անձնակազմը պարտադիր կկրի դիմակներ։ Դպրոցներում դասապրոցեսը չի սկսվի միևնույն ժամին, այլ հատուկ դասաբաշխման և դասացուցակի միջոցով։ Բացի այդ, չեղարկվել են ընդհանուր դասամիջոցները, դասարանները դասերը կսկսեն և կավարտեն առանձին դասացուցակով։
Ռուսաստանի կրթության նախարարության հանրակրթության պետական քաղաքականության և կառավարման դեպարտամենտի ղեկավար Եվգենի Սեմչենկոն հայտարարել է, որ իշխանությունները բոլոր ուսուցիչներից չեն պահանջի պարտադիր պատվաստվել հակակորոնավիրուսային պատվաստանյութով։ Պաշտոնյան նշել է, որ պատվաստումը յուրաքանչյուր անհատի որոշելիքն է։
Լուսանկարը՝ Mikhail Metzel / TASS
Մեկնաբանել