Ֆրանսիայում և Ուկրաինայում գրանցվել են կորոնավիրուսի ռեկորդային թվով նոր դեպքեր, իսկ Կատալոնիան նոր բռնկման վտանգի առջև է
Սեպտեմբերի 11-ին լրացել է կես տարին այն օրվանից, երբ Առողջապահության համաշխարհային կազմակերպությունը հայտարարել է COVID-19-ի համավարակի մասին։
Այն տարածվել է ողջ աշխարհում, բացառությամբ մի քանի կղզային երկրների։ ԱՀԿ-ի տվյալներով` կորոնավիրուս չի հայտնաբերվել Վանուատուում, Կիրիբատիում, Միկրոնեզիայում, Տոնգայում, Պալաուում, Տուվալուում, Նաուրուում, Սողոմոնի և Մարշալյան կղզիներում, ինչպես նաև Սամոայում։ Չկան տեղեկություններ նաև Թուրքմենստանում և Հյուսիսային Կորեայում կորոնավիրուսի դեպքերի մասին, չնայած այս երկրների պարագայում փորձագետներն այն կարծիքին են, որ իշխանությունները թաքցնում են իրական տվյալները։
Ջոնս Հոփքինսի համալսարանի տվյալներով՝ ներկայում աշխարհում գրանցվել է կորոնավիրուսի գրեթե 28,6 միլիոն դեպք, մահացել մոտ 917 հազար մարդ։
Ֆրանսիայում վերջին մեկ օրվա ընթացքում գրանցվել է կորոնավիրուսի 9 843 նոր դեպք, ինչը կորոնավիրուսի համավարակից ի վեր ամենաբարձր ցուցանիշն է այս երկրում։ Սեպտեմբերի 11-ին ֆրանսիական իշխանությունները խստացրել են մի շարք սահմանափակումներ, որպեսզի հնարավոր լինի խուսափել նոր տոտալ լոքդաունից։
Իսպանիայի Կատալոնիա ինքնավար շրջանում սեպտեմբերի 11-ին նշվում է Կատալոնիայի ազգային օրը, ինչի կապակցությամբ տեղական իշխանությունները փողոց են հանել մոտ 48 հազար մարդու։ Տոնակատարության շրջանակներում, շրջանի ողջ տարածքում, կազմակերպվել է շուրջ 100 երթ։ Կատալոնիայի ազգային ասամբլեան պնդում է, որ ձեռնարկվել են անվտանգության բոլոր միջոցները և պահպանվել են հիգիենայի կանոնները։ Ավելի վաղ, Բարսելոնայի բժշկական քոլեջի նախագահ Խաումե Պադրոսը իշխանություններին և քաղաքացիներին կոչ էր արել հրաժարվել զանգվածային միջոցառումներից։
Արևմտյան Եվրոպայի մի շարք շրջաններում համաճարակաբանական իրավիճակը դարձյալ վատացել է։ Իսպանիան, վարակվածների թվով, կորոնավիրուսից ամենաշատ տուժած երկիրն է (մոտ 576,7 հազար)։ Այստեղ մահացել է մոտ 29,7 հազար մարդ։
Համավարակի ողջ ընթացքում Շվեյցարիան հազվադեպ է հիշատակվել կորոնավիրուսի վերաբերյալ լուրերի տեսանկյունից։ Սակայն վերջին մի քանի օրերին Ֆրայբուրգ կանտոնի երկու ծերանոցներում կորոնավիրուսի բռնկում է սկսվել։ COVID-19 է հայտնաբերվել 90 մարդու մոտ (ծերանոցի 58 շահառուի և 32 աշխատակցի), 8 մարդ էլ մահացել է։ Սոցիալական ծառայությունները փորձում են տարեց մարդկանց բաշխել հիվանդանոցներով, որտեղ նրանք կստանան ավելի լավ խնամք։ Կորոնավիրուսի համավարակի պատճառով շվեյցարական ծերանոցներում էականորեն կրճատվել է նաև աշխատակիցների թիվը։ Շվեյցարիայում վարակվածների թիվը գերազանցում է 46 հազարը, մահացել է ավելի քան 1700 մարդ։
Մեկ օրվա ընթացքում կորոնավիրուսի ռեկորդային ցուցանիշներ են գրանցվել նաև Ուկրաինայում (3 144) և Չեխիայում (1 382)։ Երկու երկրների իշխանություններն էլ կարծում են, որ մարդիկ թուլացրել են զգոնությունը և սկսել չհետևել հիգիենայի կանոններին։
Մի քանի ժամից Մեծ Բրիտանիայում դարձյալ պարտադիր կդառնա երկշաբաթյա պարտադիր կարանտինը բոլոր այն անձանց համար, որոնք կվերադառնան Պորտուգալիայից։ Բացառություն են կազմում միայն Ազորյան կղզիները և Մադեյրան։ Կարանտինը վերականգնվում է նաև Հունգարիայից ժամանածների վրա, իսկ Անգլիան (Ուելսից և Շոտլանդիայից առանձին) ցուցակում ներառել է նաև Ֆրանսիական Պոլինեզիան։
Մեծ Բրիտանիայի իշխանությունները Հունգարիայում և Պորտուգալիայում առկա համաճարակային իրավիճակը համարում են անբարենպաստ, սակայն զուգահեռաբար պարտադիր կարանտինի ենթակա երկրների ցանկից հեռացրել են Շվեդիային, որը կորոնավիրուսի համավարակից ի վեր չի գնացել լոքդաունի։
Հնդկաստանում դարձյալ գրանցվել է օրական կտրվածքով հակառեկորդ (մոտ 96 000 նոր դեպք)։ Արդեն մեկ շաբաթից ավելին է երկրում կորոնավիրուսի նոր դեպքերի թիվը գերազանցում է 90 հազարը։ Հնդկաստանում կորոնավիրուսով վարակվածների թիվը գերազանցում է 4,5 միլիոնը (երկրորդն է աշխարհում), մահացել է մոտ 77,6 հազար մարդ։
ԱՄՆ-ն շարունակում է առաջատարը մնալ կորոնավիրուսի ընդհանուր ցուցանիշներով և մահվան դեպքերի թվով։ Երկրի գլխավոր համաճարակաբան Էնթոնի Ֆաուչին կոչ է արել ամերիկացիներին «տնից դուրս չգալ» առաջիկա ամիսներին։ «Չի կարելի թերագնահատել համավարակի պոտենցիալը։ Չի կարելի հուսադրվել և նայել վարդագույն ակնոցներով։ Մենք պետք է ցուցաբերենք ուշադրություն և կարողանանք հաղթահարել առաջիկա աշունն ու ձմեռը, որը հեշտ չի լինելու»,- նշել է Ֆաուչին։
Համավարակի ողջ ընթացքում Ֆաուչիի և Դոնալդ Թրամփի միջև բազմիցս առաջացել են տարաձայնություններ՝ կարանտինի նկատմամբ ունեցած տարբեր հայացքների պատճառով։ Օգոստոսին բժիշկը խոստովանել էր, որ իր հասցեին ստացել է մահվան սպառնալիք, իսկ նրա դուստրերին հետապնդել են հասակակիցները։
Լուսանկարը՝ «Associated Press» գործակալության
Մեկնաբանել