Այսօր լրանում է Մաշտոցի պուրակի տաղավարապատման դեմ քաղաքացիական պայքարի 40-րդ օրը, ինչպես նաև քաղաքապետարանին ուղղված, տաղավարների ապամոնտաժման պահանջի տասնօրյա ժամկետի 3-րդ օրը:

Ինչպես և վճռել էր Հանրային դատարանը, քաղաքացիները երեկվանից սկսել են այգու բարեկարգման աշխատանքները: Այսօր նրանք ապամոնտաժել են բենզալցակայանին կից երբեմնի սրճարանի բետոնը՝ ազատագրելով հողը ապագա կանաչ տարածքի համար:

Շինարարական գործիքներով ակտիվիստներին աջակցել են քաղաքապետարանի «Կենտրոն-կանաչապատում» ընկերության աշխատակիցները, ովքեր նույնպես բնապահպաններին զուգահեռ երեկվանից բարենորոգում են պուրակը. առայժմ իրականացվում են ոռոգման ցանցի արդիականացման աշխատանքներ:

Ի դեպ, քաղաքապետարանի տեղեկատվության և հասարակայնության հետ կապերի վարչության տարածած հաղորդագրության համաձայն՝ նախապատրաստական աշխատանքներ են կատարվում կանաչապատման, ծաղկապատման և պուրակի ընդհանուր ձևավորման ուղղությամբ: Տարոն Մարգարյանն էլ կրկին հավաստիացնում է, որ կանաչ տարածքների հաշվին որևէ կառուցապատում մայրաքաղաքում չի թույլատրվելու:

Ինչևէ, ակտիվ քաղաքացիները, հետևելով իրենց իսկ ստեղծած «Արդար ու անկախ քաղաքացիական դատարանի» որոշմանը, յուրաքանչյուր օր, ըստ հստակ օրակարգի, Մաշտոցի պուրակում իրականացնում են բարեկարգման, ինչպես նաև ստեղծագործական, ռեկրեացիոն և ճանաչողական բնույթի միջոցառումներ: Երեկվա միջոցառման շնորհիվ վերադարձող թռչունները բույն ունեն այգու ծառերին:

Գործում է նաև քաղաքացիական ամբիոնը, որտեղ տարբեր բնագավառների մասնագետներ իրենց տեսակետն են ներկայացնում առկա խնդիրների վերաբերյալ:

Արդեն երկու օր է՝ պուրակում տեղադրվում է հանգանակության թափանցիկ արկղ, որի միջոցները ծառայելու են բացառապես այգու բարեկարգմանը:

Արդեն 40 օր է՝ մայրաքաղաքի գլխավոր պողոտայի այս հատվածում և ասմունք է հնչում, և զուռնա-դհոլ, սակայն այգու առօրյայի ավանդական ուղեկիցը մնում է կիթառի մեղեդին:

Տեսանյութը՝ Խաժակ Դրամփեանի