HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Նորաստեղծ «Թումանյանի անտառտնտեսություն» մասնաճյուղի Դսեղի տեղամասում վերանշանակվում են նախկին անտառապետերը

Միաձուլումից հետո մասնաճյուղի Դսեղի տեղամասի անտառներում ապօրինի անտառահատումները շատացել են

«Հայանտառ» ՊՈԱԿ-ի Դսեղի և Լալվարի անտառտնտեսությունների միաձուլմամբ ստեղծված «Թումանյանի անտառտնտեսություն» մասնաճյուղն արդեն գործում է: Մասնաճյուղի  անտառային տարածքները վերահսկելու և կառավարելու համար  «Հայանտառը» մասնաճյուղին չի ապահովել պատշաճ կադրերով և տրանսպորտային ու տեխնիկական միջոցներով: «Մասնաճյուղի միակ «Նիվա» մակնիշի ավտոմեքենան վերանորոգելու համար տեղափոխել ենք Երևան»,- ասում է օգոստոսի 18-ից  «Թումանյանի անտառտնտեսություն» մասնաճյուղի տնօրեն նշանակված Կամո Ղարագոզյանը:

Վերջինիս խոսքով՝ Շրջակա միջավայրի նախարարությունից խոստացել են 1,5 ամիս հետո մասնաճյուղին տրամադրել նոր տրանսպորտային միջոցներ և տեխնիկա: Տնօրենի ասելով՝ մինչ այդ «Լալվարի անտառտնտեսություն» մասնաճյուղի 38,2 հազար հա անտառները վերահսկվելու են մասնաճյուղի աշխատողների ավտոմեքենաներով: Դսեղի անտառտնտեսության նախկին տնօրեն Արամ Քոչարյանի խոսքով, Լավարի անտառտնտեսությունը և Դսեղի անտառտնտեսությունը միավորելուց հետո ամեն օր մասնաճյուղի Դսեղի տեղամասի անտառներից միջինը 100 ծառ է հատվում:

Կամո Ղարագոզյանը Դսեղի տեղամասում Դսեղի անտառապետության անտառապետ է նշանակել Նորիկ Ալիխանյանին, ով 2013թ.-ին աշխատել է Լորուտի անտառպետության Մարցի տեղամասի անտառապահ: «Հետք»-ը ժամանակին անդրադարձել է Նորիկ Ալիխանյանի գործունեությանը: 2013 թ.-ին սեպտեմբերի 2-ին նա փորձում էր իր պահաբաժնում ապօրինի հատված 5 բեռնատար ավտոմեքենա փայտը կոծկել: Այդ ժամանակ նա մեզ ներկայացավ Դավիթ Շմավոնյան ազգանունով:

Կամո Ղարագոզյանի ասելով՝ Նորիկ Ալիխանյանը Դսեղի անտառապետ աշխատելու համար փորձաշրջան է անցնելու, եթե իրեն արդարացնի, կշարունակի աշխատել անտառապետ: Ն. Ալիխանյանը վերահսկելու է Դսեղի 5782 հա անտառները: «Նախկինում պահանջում էին անտառը ապօրինի հատել՝ հատում էի, հիմա էլ կպահանջեն ապօրինի չհատել՝ չեմ հատի»,-  ասաց Նորիկ Ալիխանյանը:

«Քննչական կոմիտեից մենք նախորդ տարվա նոյեմբերին գրություն ենք ստացել, որ մարցեցի Վաչե Խաչատրյանը չի համապատասխանում անտառապետի պաշտոնին՝ Մարցի անտառապետության տարածքում ունեցած մեծ խախտումների համար: Քննչական կոմիտեն մեզ առաջարկել էր Մարցի անտառապետի պաշտոնից  ազատել Վաչե Խաչատրյանին»,-հայտնեց Արամ Քոչարյանը: Վերջինս «Հայանտառ» ՊՈԱԿ-ի նախկին տնօրեն Վահե Մացակյանին երեք միջնորդագիր է ուղարկել Վաչե Խաչատրյանին Մարցի անտառապետի պաշտոնից ազատելու համար։

«Հայանտառ»-ի այլևս նախկին տնօրեն Վ. Մացակյանը չի բավարարել Ա. Քոչարյանի միջնորդագրերը: Հիշեցնեք, որ այս նույն Վաչե Խաչատրյանը, 2013թ.-ի  հոկտեմբերին վախեցրեց «Մարց Էներջի» ՍՊԸ-ի կողմից Մարց գետի վրա 3-րդ հէկի կառուցման դեմ բողոքող մարցեցիներին:

Մարցի անտառապետության Ծոփ հանդամասում, Թումանյանի համայնքապետ Լևոն Զավարյանի ամառանոցի հարևանությամբ օրերս մեծ քանակությամբ ծառեր են հատվել: Այդ մասին Լևոն Զավարյանն ահազանգել է «Թումանյանի անտառտնտեսություն» մասնաճյուղի տնօրեն Կամո Ղարագոզյանին: Վերջինս մեզ  հանձնեց Ծոփ հանդամասում հատված 10 ծառերի կոճղերի նկարներ: Վաչե Խաչատրյանին վստահվել է Մարցի 4717 հա անտառների պահպանությունը․

«Օգոստոսի 21-ին ինձ աշխատանքից ազատելուց 3 օր հետո ես հասկացա, որ Դսեղի անտառներում նորից ստեղծվել է ապօրինի հատումների նախկին  իրավիճակը»,- ասում է Արամ Քոչարյանը:

Վերջինիս խոսքով՝ չվերահսկվելու պատճառով ամեն օր Դսեղի տեղամասում 100 ծառ է հատվում: Դսեղի տեղամասը միայն «Իքատակ» հանդամասը չէ: Տեղամասի մեջ մտնում են 3 անտառապետություններ: Սեպտեմբերի 11-ին և 15-ին Դսեղի անտառապետության «Իքատակ» հանդամասում լուսանկարեցինք հին և նոր հատված ծառերի 30 կոճղ: Կամո Ղարագոզյանը չհերքեց Դսեղի տեղամասում  կատարվող ապօրինի հատումների փաստը:

«Միգուցե, որոշ մարդիկ օգտվել են մեր խառը իրավիճակից և ապօրինի հատումներ են արել: Դսեղի անտառապետության «Իքատակ» հանդամասում մեր կողմից հայտնաբերված ապօրինի հատված 300 ծառերի 20-30 տոկոսը թարմ հատումներ  են»,- ասաց նա: «Իքատակ» հանդամասը մարցեցիներին ծառայում է որպես անասունների ամառանոց: Սարվորների 20-ից ավելի շներ իրենց ոհմակով հսկում են անտառի մուտքն ու ամառանոցի տարածքը: Շների ահից ամառանոցի տարածքով օտար ոչ մի փայտահատ չի կարող մտնել անտառ: Չի բացառվում, որ «Իքատակի» անտառներում ապօրինի ծառահատողները թաքնված են հենց սարվորների թիկունքում:

Արամ Քոչարյանն ասում է, որ իր պաշտոնավարման 10 ամիսներին նախկին Դսեղի անտառատնտեսության Դսեղի, Մարցի և Մոտկորի անտառապետությունների անտառներում ստուգել և հաշվառել է վերջին 2-3  տարիներին ապօրինի հատված 3000 ծառ: Ա. Քոչարյանը Լորուտի  անտառպետությունում չի հասցրել կատարել ուսումնասիրություններ՝ անտառտնտեսությունները միացնելու պատճառով:

«Ուզում էի մաքրել անտառը, որ ապօրինի հատված ծառ հայտնաբերելիս անտառապետերը չկարողանան ինձ խաբել, թե կտրված ծառը հին է»,- բացատրեց նախկին տնօրենը: Ապօրինի հատված 3000 ծառը Ա. Քոչարյանը կնքել և համապատասխան արձանագրությունները ներկայացրել է «Հայանտառ» ՊՈԱԿ և ոստիկանության Թումանյանի բաժին:

«Հայանտառ»-ի անտառների պահպանության բաժնի պետ Աիդա Մանուկյանը հեռախոսով հայտնեց, որ «Դսեղի անտառտնտեսություն» մասնաճյուղի նախկին տնօրեն Արամ Քոչարյանը պաշտոնավարման 10 ամիսներին կազմել է ապօրինի անտառահատումների 46 արձանագրություն՝ ապօրինի հատված 2748 ծառի և 16 ճյուղերի վերաբերյալ:

Աիդա Մանուկյանի ասելով՝ 46 արձանագրություններից մեկ արձանագրություն, որի հատողը հայտնի է, ուղարկվել է Բնապահպանության և ընդերքի տեսչական մարմնին, 45 արձանագրություն ուղարկվել է ոստիկանության Թումանյանի բաժին:

Թումանյանի ոստիկանապետ Արտակ Գյուրջանյանը սեպտեմբերի 15-ին հայտնեց, որ Արամ Քոչարյանի և «Հայանտառ» ՊՈԱԿ-ի կողմից ոստիկանության բաժին ուղարկված 3000 ապօրինի ծառահատումների և այլ արձանագրություններով հարուցվել են քրեական գործեր: Դրանց նախաքննության ընթացքի մասին մենք սեպտեմբերի 17-ին հարցում արեցինք նաև Քննչական կոմիտեի Լոռու մարզային քննչական վարչության պետ Ա. Հովհաննիսյանին:

«Արամ Քոչարյանի կողմից Դսեղի անտառների ապօրինի ծառահատումների արձանագրությունների հիման վրա Թումանյանի քննչական բաժնում վարույթ է ընդունվել քրեական գործեր, որոնցով ապօրինի հատված ծառերի թիվը կազմել է  2655»,-  մեր հարցմանը պատասխանել է Թումանյանի քննչական բաժնի պետ  Է. Կարապետյանը:

Մոտ 25 տարի Դսեղի անտառապետության 4-րդ պահաբաժնի անտառապահ աշխատած Արամ Քոչարյանը պնդում է, որ Դսեղի անտառների թալանը կատարում  են ոչ թե գյուղացիները, այլ անտառի աշխատողները: Մարցի երբեմնի գյուղապետ  Հրաչիկ Հովհաննիսյանը Դսեղի և Լալվարի անտառտնտեսությունների միացումը բարեփոխում չհամարեց. «Ես անտառտնտեսությունների միացումը սխալ եմ համարում, անտառի տարածքը մեծացել է: Մեծացած անտառի հսկողությունը ավելի կվատանա»,- ասաց Հրաչիկ Հովհաննիսյանը:

«Անտառտնտեսությունների միացումը բարեփոխում չեմ համարում, սրա նպատակն ավելի շատ անտառագողերին աջակցելն էր»,- ասում է Արամ Քոչարյանը:

Կամո Ղարագոզյանի խոսքով՝ հոկտեմբերի 15-ից մասնաճյուղում սկսվել են անտառների աշնանային ստուգումները: «Ստուգելու ենք Դսեղի, Մարցի, Լորուտի և  մասնաճյուղի բոլոր անտառային տարածքները: Ստուգումներից հետո կտեսնեք՝ ով արժանի չլինի, իր տեղում չի աշխատի»,- ասաց Կամո Ղարագոզյանը: Վերջինս հավատացնում է, թե ամեն ինչ անելու է «Թումանյանի անտառտնտեսություն» մասնաճյուղի անտառներում փայտագողությունը բացառելու համար:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter