![](/static/articles/12/23/57/l-7ltQmJ1tgt.jpg)
Սպիտակ տունը չի մեկնաբանել Լեռնային Ղարաբաղի հակամարտության ընդլայնման վերաբերյալ հարցը
Սպիտակ տան մամլո քարտուղար Քեյլի Մաքինենին հոկտեմբերի 1-ին կայացած ճեպազրույցի ժամանակ հրաժարվել է պատասխանել այն հարցին, թե արդյոք, ամերիկյան վարչակազմի կարծիքով, Լեռնային Ղարաբաղում առկա իրավիճակը կարող է վերածվել գերտերությունների մասնակցությամբ տարածաշրջանային հակամարտության։
Նա մեջբերել է Ռուսաստանի նախագահ Վլադիմիր Պուտինի, ԱՄՆ նախագահ Դոնալդ Թրամփի և Ֆրանսիայի նախագահ Էմանուել Մակրոնի՝ Լեռնային Ղարաբաղի վերաբերյալ ավելի վաղ տարածած համատեղ հայտարարությունը։ «Մենք կոչ ենք անում անմիջապես դադարեցնել թշնամական գործողությունները»,- նշել է նա։ Մաքինենին հավելել է, որ սա այն ամենն է, ինչ այս պահին կարող է ասել՝ շրջանցելով այն հարցը, թե արդյոք հակամարտությունը կարող է ընդլայնվել։
Ավելի վաղ, Մինսկի համանախագահ երեք երկրների՝ Ռուսաստանի, ԱՄՆ-ի և Ֆրանսիայի նախագահները տարածել էին համատեղ հայտարարություն, որտեղ հակամարտող կողմերից պահանջել էին անմիջապես դադարեցնել մարտական գործողությունները։ Նախագահներն ընդգծել էին, որ «ամենավճռական ձևով դատապարտում են բռնության սրումը, որն առկա է Լեռնային Ղարաբաղի հակամարտության շփման գծում»։
Լուսանկարը՝ Doug Mills/The New York Times
Մեկնաբանել