![](/static/articles/12/24/36/l-mjx97dUaeM.jpg)
ԵԱՀԿ Մինսկի խումբը մարդասիրական զինադադար է առաջարկում՝ զոհվածների մարմինները հանելու համար
ԵԱՀԿ Մինսկի խմբի համանախագահները հանդես են եկել համատեղ հայտարարությամբ, որտեղ կողմերին առաջարկում են զինադադար՝ զոհվածների մարմինները հանելու համար։ Այդ մասին նշվում է ԵԱՀԿ պաշտոնական կայքում հրապարակված հաղորդագրության մեջ։
«Համանախագահները խստորեն դատապարտում են Լեռնային Ղարաբաղի հակամարտության գոտում շարունակվող ուժի կիրառումը, ինչպես նաև շփման գծից հեռու գտնվող Հայաստանի և Ադրբեջանի տարածքների թիրախավորումը։ Մենք նաև մեր անհանգստությունն ենք հայտնում քաղաքացիական զոհերի թվի աճի մասին հաղորդումների կապակցությամբ: Քաղաքացիական բնակչության թիրախավորումը կամ դրան սպառնալը երբեք որևէ պարագայում ընդունելի չէ։
Համանախագահները կողմերին կոչ են անում լիովին պահպանել խաղաղ բնակչության պաշտպանության՝ իրենց միջազգային պարտավորությունները: Համանախագահները նաև շեշտում են, որ արտաքին կողմերի մասնակցությունը բռնությունների աճին խարխլում է տարածաշրջանում երկարատև խաղաղության հասնելու ջանքերը:
Հիշեցնելով երեք համանախագահ երկրների նախագահների հոկտեմբերի 1-ի հայտարարությունը՝ համանախագահները կրկին կոչ են անում անհապաղ դադարեցնել ռազմական գործողությունները և բարեխղճորեն ու առանց նախապայմանների վերսկսել բովանդակային բանակցությունները:
Համանախագահները շտապ կոչ են անում անհապաղ հաստատել մարդասիրական հրադադար՝ ԵԱՀԿ-ի և Կարմիր Խաչի միջազգային կոմիտեի հետ համաձայնեցնելով զոհված զինծառայողների աճյունների վերադարձը»,- նշվում է տարածված հաղորդագրության մեջ։
Հիշեցնենք, հոկտեմբերի 1-ին Ռուսաստանի Դաշնության նախագահ Վլադիմիր Պուտինը, ԱՄՆ նախագահ Դոնալդ Թրամփը և Ֆրանսիայի նախագահ Էմանուել Մակրոնը Լեռնային Ղարաբաղի հարցով համատեղ հայտարարություն էին տարածել, որտեղ ամենավճռական ձևով դատապարտում էին բռնության աճը, որն առկա է Լեռնային Ղարաբաղի հակամարտության գոտում։
«Մենք սգում ենք զոհվածների համար և ցավակցում ենք զոհվածների և վիրավորների ընտանիքներին։ Մենք կոչ ենք անում անհապաղ դադարեցնել մասնակից կողմերի զինված ուժերի միջև մարտական գործողությունները։ Մենք նաև կոչ ենք անում Հայաստանի և Ադրբեջանի ղեկավարներին անհապաղ ստանձնել պարտավորություններ բարեխղճորեն և առանց նախապայմանների առաջադրման վերսկսելու կարգավորմանն ուղղված առարկայական բանակցությունները՝ ԵԱՀԿ Մինսկի խմբի համանախագահների աջակցությամբ»,- նշվում էր տարածված հաղորդագրության մեջ։
Լուսանկարը՝ ԵԱՀԿ պաշտոնական կայք էջի
Մեկնաբանել