Երեքշաբթի՝ հոկտեմբերի 6-ին, աշխատանքային այցով Ադրբեջան կմեկնի Թուրքիայի արտաքին գործերի նախարար Մևլյութ Չավուշօղլուն։ Այդ մասին նշվում է Թուրքիայի արտաքին գործերի նախարարության տարածած հաղորդագրության մեջ։

«Այցի ընթացքում նախարարը կհանդիպի նաև Ադրբեջանի նախագահ Իլհամ Ալիևի հետ»,- նշվում է տարածված հաղորդագրության մեջ։ 

Թուրքիայի արտաքին գերատեսչական մարմինը հավելել է, որ Չավուշօղլուն Ադրբեջանի արտաքին գործերի նախարար Ջեյհուն Բայրամովի հետ մտքեր կփոխանակի Լեռնային Ղարաբաղի իրավիճակի և տարածաշրջանային ու միջազգային այլ հարցերի շուրջ։

Արցախա-ադրբեջանական հակամարտության վերջին զարգացումների ֆոնին Թուրքիան ակնհայտ աչքի է ընկնում ադրբեջանամետ քաղաքականությամբ և հայտարարություններով։ Բացի այդ, թուրքական զինուժն ու տեխնիկան մասնակցում են ադրբեջանական հարձակողական գործողություններին, իսկ ավելի վաղ Թուրքիան Սիրիայից գրոհայիններ էր տեղափոխել նաև Ադրբեջանի տարածք՝ մասնակցելու մարտական գործողություններին։

Լուսանկարը՝ «Անադոլու» գործակալության