Արցախի տեղեկատվական շտաբը տեղեկացնում է, որ ՌԴ-ի Արտաքին հետախուզության ծառայության տվյալներով՝ Լեռնային Ղարաբաղի հակամարտության գոտի են ձգվում մերձավորարևելյան միջազգային ահաբեկչական կազմակերպություններից վարձկաններ, մասնավորապես՝ «Ջաբհաթ ան-Նուսրայից», «Ֆիրքաթ ալ-Համզայից», «Սուլթան Մուրադից», ինչպես նաև քրդական ծայրահեղական խմբավորումներից։ «Խոսքը հարյուրավոր և արդեն նույնիսկ հազարավոր արմատականների մասին է, որ հույս ունեն փող աշխատել ղարաբաղյան նոր պատերազմում»,- հայտնել է  ՌԴ արտաքին հետախուզության ծառայության պետ Սերգեյ Նարիշկինը։

Ավելի վաղ ՌԴ արտաքին հետախուզության ծառայության պետը տեղեկացրել էր, որ Անդրկովկասը կարող է դառնալ հարյուրավոր ահաբեկիչների համար նոր ցատկահարթակ։

Քիչ առաջ Արցախի տեղեկատվական շտաբը նոր հայտարարություն ներկայացրեց, որտեղ ասվում է․ «Ռուսաստանի համար՝ որպես ԵԱՀԿ Մինսկի խմբի համանախագահող երկիր, տարածաշրջանում նոր պատերազմն անթույլատրելի է»։