Կոալիցիոն գործընկերները՝ ՀՀԿ-ն, ԲՀԿ-ն եւ ՕԵԿ-ը, իրենց նախընտրական կարգախոսների ընտրության հարցում կարծես թե անշեղորեն պահել են կոալիցիոն հավատարմությունը եւ երեքն էլ օգտագործում են «հավատ» բառը:

ՀՀԿ-ն ընտրել է «Հավատանք, որ փոխենք», ԲՀԿ-ն՝  «Հավատա, վստահիր, պահանջիր», իսկ ՕԵԿ-ը՝ «Հավատանք, որ կառուցենք օրինաց երկիր»:

Քաղաքագետ Մանվել Սարգսյանը «Հետքի»  հետ զրույցում ասաց, թե կոալիցիայում խորքային զգում են, թե ինչը գոյություն չունի եւ չի կարող նման իրավիճակում գոյություն ունենալ եւ վերցնում պաստառ են սարքում: «Հիմա հավատի խորքային ճգնաժամ է եւ միանգամից վերցնում են իրենց ձեռքը, որ հակառակորդը չվերցնի»,- ասում է Մանվել Սարգսյանը:

Քաղաքագետի ասելով՝ «հավատ» բառը չի կարող ընտրողի վրա ազդեցություն թողնել, քանի որ մարդը տեսնում է, թե կուսակցությունն ինչով է զբաղված, եւ ինքն էլ կորոշի՝ հավատա՞լ, թե՞ ոչ:

«Բոլորը պարզ տեսնում են, թե ինչով են զբաղված երեք կուսակցություններն էլ, էլ ինչի՞ն հավատան: Հենց ընտրական ցուցակները, նրանց պահվածքը, օրինակ՝ խոշոր մոնոպոլիստը կարող է խոսել, որ մոնոպոլիա չպետք է լինի: Ասում են մի բան, բայց անում են ճիշտ հակառակը: Նախկին քաղաքական գործիչներին էլ, որ ներգրավեցին իրենց ցուցակներում, անմիջապես մեջբերեցին նրանց նախկինում ասած խոսքերը՝ անձերի, վարչակարգի մասին, բայց մարդիկ անում են լրիվ հակառակը»,- ավելացնում է Մանվել Սարգսյանը:

Քաղաքագետը նկատել է, որ կոալիցիոն երեք կուսակցություններն էլ ընտրել են կարգախոս, որն իրենց արած գործին հակասում է: