ՌԴ ԱԳՆ-ն Թուրքիայի հետ շփումներում բարձրաձայնում է Լեռնային Ղարաբաղի մարտերում վարձկանների մասնակցության հարցը
Ռուսաստանը թուրքական կողմի հետ շփումներում բարձրացնում է Լեռնային Ղարաբաղում ծավալվող մարտական գործողություններին Սիրիայից և Լիբիայից վարձկանների առկայության հարցը։ Այդ մասին երկուշաբթի օրը՝ հոկտեմբերի 19-ին, լրագրողներին հայտնել է Մերձավոր Արևելքում և Աֆրիկայի երկրներում ՌԴ նախագահի հատուկ ներկայացուցիչ, Ռուսաստանի արտաքին գործերի նախարարի տեղակալ Միխայիլ Բոգդանովը։
«Մենք քննարկում ենք բոլոր հարցերը»,- նշել է Բոգդանովը՝ պատասխանելով լրագրողներից մեկի հարցին։ Պատասխանելով ճշգրտող հարցին, թե արդյոք ռուսական կողմը շփումների ընթացքում ընդգծում է հակամարտության գոտում վարձկանների մասնակցության անընդունելիությունը, նախարարի տեղակալը պատասխանել է՝ բնականաբար։
Ավելի վաղ, ՌԴ ԱԳՆ-ն իր խորը մտահոգությունն էր հայտնել Լեռնային Ղարաբաղի հակամարտության գոտում Սիրիայից և Լիբիայից գրոհային-վարձկանների ներգրավման հարցին։ Մոսկվան հայտարարել էր, որ այդպիսի գործընթացները ոչ միայն հանգեցնում են հակամարտության գոտում լարվածության սրմանը, այլև սպառնալիքներ ստեղծում տարածաշրջանի բոլոր երկրների անվտանգության համար։
Լուսանկարը՝ РИА Новости / Екатерина Чеснокова
Մեկնաբանել