ՈՒԵՖԱ-ն ժամանակավորապես արգելել է իր հովանու ներքո հանդիպումների անցկացումը Հայաստանում և Ադրբեջանում
Եվրոպական ֆուտբոլային ասոցիացիաների միության (ՈՒԵՖԱ) գործադիր կոմիտեն որոշել է ժամանակավորապես արգելել իր հովանու ներքո տեղի ունեցող ակումբային և ազգային հավաքականների հանդիպումների անցկացումը Հայաստանում և Ադրբեջանում։ Այս մասին ասվում է ՈՒԵՖԱ-ի պաշտոնական կայքում հրապարակված մամուլի հաղորդագրությունում։
Արգելքի պատճառը սեպտեմբերի 27-ին Արցախում Ադրբեջանի կողմից սանձազերծված պատերազմն է։ Եվրոպական ֆուտբոլային միությունը գտնում է, որ Հայաստանում և Ադրբեջանում ներկայիս պայմանները թույլ չեն տալիս իր հովանու ներքո խաղեր անցկացնել։
ՈՒԵՖԱ-ն խնդրանքով դիմելու է Հայաստանի և Ադրբեջանի ֆուտբոլի ֆեդերացիաներին և ակումբներին, որպեսզի նրանք իրենց նոմինալ տնային հանդիպումների համար այլընտրանքային մարզադաշտեր առաջարկեն։
Հաղորդագրության մեջ նշվում է, որ ՈՒԵՖԱ-ի գործադիր կոմիտեի այս որոշումը չի տարածվում 2021թ․ ամռանը կայանալիք Եվրոպայի առաջնության հանդիպումները Բաքվում անցկացնելու վրա։
Հիշեցնենք, որ որ Արցախում պատերազմական իրավիճակով պայմանավորված՝ Հայաստանի ազգային հավաքականն արդեն իսկ ՈՒԵՖԱ-ի Ազգերի լիգայի մեկ տնային հանդիպում անցկացրել է երրորդ երկրում։ Հոկտեմբերի 11-ին Հայաստանի հավաքականը Լեհաստանում ընդունեց Վրաստանին և ոչ-ոքի խաղաց։
Մեր հավաքականի հաջորդ տնային հանդիպումը նախատեսված է նոյեմբերի 18-ին։ Ազգերի լիգայի խաղարկության 6-րդ տուրում Հայաստանի ազգային ընտրանին պետք է ընդունի Հյուսիսային Մակեդոնիայի հավաքականին։ Հանդիպումն ի սկզբանե նախատեսված է Երևանի Հանրապետական մարզադաշտում։
Լուսանկարը՝ EPA-EFE/JEAN-CHRISTOPHE BOTT
Մեկնաբանել