Այս տարվա հոկտեմբերին, նախորդ տարվա նույն ամսվա համեմատ, Հայաստանի սպառողական շուկայում գնաճը կազմել է 1.3%: 

Ինչպես ցույց են տալիս Վիճակագրական կոմիտեի հրապարակած տվյալները, ըստ խոշորացված ապրանքախմբերի՝ ամենամեծ չափով թանկացել են ալկոհոլային խմիչքն ու ծխախոտը՝ 9.7%-ով: Միևնույն ժամանակ, կան որոշ ապրանքներ, որոնց գծով գնանկում ունենք, ինչպես կոշիկի ու հագուստի՝ 2.8%-ով: 

Ընդհանուր առմամբ, պարենային ապրանքները, որոնց մեջ ներառվում են ինչպես սննդամթերքը, այնպես էլ՝ ծխախոտը, ալկոհոլային և ոչ ալկոհոլային խմիչքը, այս տարվա հոկտեմբերին, նախորդ տարվա նույն ամսվա համեմատ, միջինում թանկացել են 1.5%-ով, ոչ պարենային ապրանքները՝  0.6%-ով, իսկ ծառայությունների սակագները բարձրացել են 1.4%-ով:

Պատկերն այլ է, երբ այս խոշորացված ապրանքախմբերը դիտարկում ենք ըստ ներառվող ապրանքների: Քանի որ սպառողական ապրանքների գներն ունեն սեզոնայնություն, հետևաբար առավել նպատակահարմար է նշված ամսվա գները համեմատել ոչ թե նախորդ ամսվա, այլ՝ նախորդ տարվա նույն ամսվա հետ:

Սննդամթերքի գներ

2020 թ. հոկտեմբերին 2019թ. հոկտեմբերի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 0.6% գնաճ: Առավել տեսանելի գնաճ կա շաքարավազի և ձեթի՝ արևածաղկի բուսական յուղի ապրանքախմբերում: Իսկ որոշ ապրանքները էժանացել են:

Մասնավորապես.

- Շաքարը և շաքարավազը թանկացել են 20.2%-ով,

- Արևածաղկի բուսական յուղը՝  16.1%-ով (յուղերի և ճարպերի ապրանքախմբում  արձանագրվել է 5.1% գնաճ)

- Կաթնամթերքը, պանիրը և ձուն՝ 1%-ով,

- Ալկոհոլային խմիչքն ու ծխախոտը՝ 9.7%-ով,

- Միրգը՝  11.3%-ով,

- Հացաբուլկեղենն ու ձավարեղենը՝ 3.6%-ով:

Միևնույն ժամանակ՝

- Բանջարեղենը միջինում էժանացել է  9.5%-ով, 

- Մսամթերքը՝ 1.7%-ով:

Հիշեցնենք, որ Տնտեսական մրցակցության պաշտպանության պետական հանձնաժողովը (ՏՄՊՊՀ) ավելի վաղ անդրադարձել է շաքարավազի, ալյուրի, ձեթի և կարագի (կարագի և ալյուրի գնային փոփոխությունները ՎԿ-ն առանձին չի ներկայացրել) թանկացմանը: Կառույցը պնդում է, որ թանկացումը պայմանավորված է միջազգային գներով, այսինքն՝ երկրներում, որտեղից ներմուծվում են այդ ապրանքները, թանկացում է գրանցվել:

• ՏՄՊՊՀ. Շաքարավազի եւ կարագի թանկացումը պայմանավորված է ներկրման երկրներում իրացման գներով

Ոչ պարենային ապրանքների գներ

Ոչ պարենային ապրանքների շուկայում 2020թ. հոկտեմբերին 2019թ. հոկտեմբերի համեմատ արձանագրվել է 0.6% գնաճ: Վիճկոմիտեն արձանագրել է, որ բենզինի գինը նվազել է 14.4% -ով, իսկ դիզելային վառելիքի գինը՝  20.9%-ով: 

Ծառայությունների սակագներ

 Մատուցված ծառայությունների ոլորտում սակագները միջինում բարձրացել են 1.4%-ով: 

Արտարժույթի շուկա

Հոկտեմբերին հայկական դրամը որոշակիորեն արժեզրկվել է: Մասնավորապես, ԱՄՆ դոլարի նկատմամբ հայկական դրամի միջին հաշվարկային փոխարժեքը կազմել է 491.7 դրամ, որը 3.2%-ով բարձր է 2019թ. հոկտեմբերի համապատասխան ցուցանիշից (476.3 դրամ):

• Բնականոն զարգացումներ են. ԿԲ-ն փոխարժեքի շուկայում միջամտության կարիք չի տեսնում 

Այս տարվա առաջին 10 ամիսների կտրվածքով (հունվար-հոկտեմբերը 2019թ.
հունվար-հոկտեմբերի նկատմամբ) Հայաստանում գնաճը կազմել է 0.9%: Տարվա ընթացքում 12-ամսյա գնաճը չի գերազանցել  1.8%-ը: Մանրամասները կարող եք տեսնել ստորև ներկայացված գրաֆիկում: