Երևանի քաղաքապետարանի ենթակայության տակ գործող դպրոցներում գտնվող 682 հատ անսարք UPS (հոսանքի անխափան սնուցման սարք) նվիրաբերվել է Էկոնոմիկայի նախարարությանը։ Երևանի քաղաքապետ Հայկ Մարությանը նոյեմբերի 2-ի իր որոշմամբ հանրակրթական հաստատություններին թույլ է տվել իրենց պատկանող սարքավորումները նվիրաբերել նախարարությանը։

Քաղաքապետի համապատասխան որոշման հավելվածի ուսումնասիրությամբ պարզվում է, թե որ վարչական շրջանում քանի նմանատիպ անսարք UPS է հավաքվել։ Աջափնյակի դպրոցներում եղել է 120 հատ անսարք UPS, Ավանում՝ 25 հատ, Արաբկիրում՝ 104 հատ, Դավթաշենում՝ 22 հատ, Էրեբունիում՝ 71 հատ, Կենտրոնում՝ 62 հատ, Նոր Նորքում՝ 65 հատ, Նորք-Մարաշում` 10 հատ, Մալաթիա-Սեբաստիայում՝ 81 հատ, Նուբարաշենում՝ 10 հատ, Շենգավիթում՝ 83 հատ, Քանաքեռ–Զեյթունում՝ 29 հատ։ Խափանված UPS սարքերի ընդհանուր արժեքը կազմել է 2 միլիոն 301 հազար 850 դրամ։

• Անսարք UPS–ները վերապրոֆիլավորում, ուղարկում են Արցախ․ 12 վոլտ հոսանքից ստանում են 220 վոլտ  

Էկոնոմիկայի նախարարությունից «Հետք»-ին փոխանցեցին, որ այդ սարքավորումների նվիրատվությունը պայմանավորված է ռազմական գործողություններով։ Խափանված UPS սարքավորումներ փոխանցվել են նաև պետական մի շարք հաստատություններից։ Թե ի՞նչ նպատակով են օգտագործվելու սարքավորումները՝ նախարարությունից չեն մանրամասնում։

«Հետք»-ը հոկտեմբերի 19-ին գրել էր, եր Երևանի Պռոշյան փողոցում կամավորներից կազմված խումբն անսարք UPS-ները վերապրոֆիլավորում է՝ 12 վոլտը 220 վոլտի վերածող սարքերի և ուղարկում Արցախ։ Էկոնոմիկայի նախարարությունում հավաքվող խափանված սարքերը հենց այդ նպատակով էլ կվերապրոֆիլավորվեն։ 

Լուսանկարը՝ Անի Սարգսյանի