Որևէ թուրք խաղաղապահ չի ուղարկվի Լեռնային Ղարաբաղ։ Այդ մասին հայտարարել է Ռուսաստանի արտաքին գործերի նախարար Սերգեյ Լավրովը՝ ռուսաստանյան և արտասահմանյան լրատվամիջոցների ներկայացուցիչների հետ կազմակերպված մամուլի ասուլիսի ժամանակ։ 

«Լեռնային Ղարաբաղ Թուրքիայի Հանրապետության որևէ խաղաղապահ ստորաբաժանում չի ուղարկվի։ Այդ մասին հստակ նշվել է առաջնորդների հայտարարության մեջ»,- նշել է Լավրովը։ Խոսքը նոյեմբերի 9-ին ստորագրված եռակողմ հայտարարության մասին է։

Լավրովի պնդմամբ՝ թուրքական դիտորդների շարժունակությունը կսահմանափակվի Ադրբեջանում հրադադարի պահպանման նկատմամբ վերահսկողության ռուս-թուրքական մոնիթորինգային կենտրոնի տեղակայման վայրով։ «Թուրքական դիտորդների շարժունակության սահմանները սահմանափակվում են այն աշխարհագրական կոորդինատներով, որոնք կսահմանվեն Ադրբեջանի տարածքում հրադադարի վերահսկողության ռուս-թուրքական համատեղ կենտրոնի համար։ Դա Ադրբեջանի այն տարածքն է, որը մոտ չէ Ղարաբաղին և հավելյալ կհամաձայնեցվի»,- հայտարարել է Լավրովը։

Լավրովի խոսքով՝ չկա ոչ մի նշան, որ ինչ-որ մեկը փորձում է ձախողել Լեռնային Ղարաբաղի վերաբերյալ պայմանավորվածությունները։ ՌԴ արտաքին գործերի նախարարը նշել է՝ Մոսկվան համոզված է, որ բոլոր կողմերը շահագրգռված են Լեռնային Ղարաբաղում ռուս խաղաղապահների տեղակայմամբ:

Լավրովը նաև հայտարարել է, որ Հայաստանի ընդդիմությունը փորձում է շահարկել Լեռնային Ղարաբաղի շուրջ պայմանավորվածությունները։ «Մենք տեսնում ենք բողոքի ցույցեր, որոնք հիմա տեղի են ունենում Երևանում։ Մենք տեսնում ենք, թե ինչպես է ընդդիմությունը փորձում շահարկել այս իրավիճակը»,- նշել է Լավրովը։ Նրա խոսքով՝ «այնտեղ, անշուշտ, կան անկեղծ մարդիկ, որոնց համար, հավանաբար, ցավալի է, որ այս փուլում ամեն ինչ այսպես է ավարտվում»։

Լուսանկարը՝ TACC գործակալության