Ադրբեջանի նախագահ Իլհամ Ալիևը հայտարարել է, որ Բաքվի համար ընդունելի չէ Լեռնային Ղարաբաղի համար որևէ հատուկ կարգավիճակի հնարավորությունը։

«Որևէ կարգավիճակի մասին խոսք լինել չի կարող։ Կա միասնական Ադրբեջան՝ բազմազգ և բազմակրոն»,- հայտարարել է Ալիևը երկուշաբթի՝ նոյեմբերի 16-ին, Ֆիզուլիի և Ջեբրայիլի շրջաններ կատարած այցելության ժամանակ։

Այցելության կադրերը երեքշաբթի՝ նոյեմբերի 17-ին, հեռարձակել է Ադրբեջանի պետական հեռուստատեսությունը։

Ալիևի խոսքերով՝ տարածաշրջանի հայ բնակչությանը կընձեռվեն նույն իրավունքները, ինչ Ադրբեջանի մյուս քաղաքացիներին։ «Տարբեր ազգերի և կրոնների ներկայացուցիչներ հանդիսացող Ադրբեջանի քաղաքացիները ապրում են խաղաղության և բարիդրացիական հարաբերությունների պայմաններում։ Հայ ժողովուրդը նույնպես կապրի այդպիսի պայմաններում»,- հավելել է Ալիևը՝ նշելով, որ Բաքուն Ղարաբաղի հայերին դիտարկում է որպես իր քաղաքացիների։

Հիշեցնենք, որ նոյեմբերի 9-ին Ռուսաստանի նախագահ Վլադիմիր Պուտինը, Հայաստանի վարչապետ Նիկոլ Փաշինյանը և Ադրբեջանի նախագահ Իլհամ Ալիևը ստորագրել էին համատեղ հայտարարություն, որով նախատեսվում էր Լեռնային Ղարաբաղում հաստատել հրադադար։ Ինչպես հայտարարել էր Պուտինը, հայկական և ադրբեջանական կողմերը կմնան իրենց զբաղեցրած դիրքերում, իսկ տարածաշրջանում կտեղակայվեն ռուս խաղաղապահներ։

Նախատեսվում է, որ ընդհանուր առմամբ Լեռնային Ղարաբաղում կտեղակայվի խաղաղապահ առաքելության 1960 զինծառայող, իսկ հրամանատարական շտաբը կտեղակայվի Ստեփանակերտում։ ՌԴ ՊՆ-ն ավելի վաղ նաև հայտարարել էր, որ խաղաղապահ առաքելության նպատակով Լեռնային Ղարաբաղ կփոխադրվի 90 զրահափոխադրիչ և 380 միավոր ավտոմոբիլային և հատուկ տեխնիկա։

Լուսանկարը՝ Ադրբեջանի նախագահի մամուլի ծառայության