Վարչապետ Նիկոլ  Փաշինյանի հրաժարականի պահանջով բողոքի ակցիաներն այսօր էլ շարունակվում են: Ակցիայի մասնակիցները, վանկարկելով «Նիկոլ  դավաճան», փակել էին Տիգրան Մեծ և Բաղրամյան պողոտաները:

Ոստիկանությունը բերման ենթարկեց մի շարք քաղաքացիների և բացեց Տիգրան Մեծ պողոտան:

Ակցիայի մասնակիցներից մեկը լրագրողների հետ զրույցում նշեց, որ իրենց  գլխավոր «նպատակը դավադիր ծրագրի մասին ձայն բարձրացնելը և հնարավորինս շատ մարդկանց սթափության կոչ անելն է»:

«Մենք մեզ իրավունք ենք վերապահում օգտագործել բոլոր այն գործիքակազմը, որն այս դավադիր իշխանությունն օգտագործել է իշխանության գալու համար: Իրենք քանի էդ աթոռին նստած են, չեն կարողանալու հանգիստ նստել և որևէ կարևորություն չունեցող որոշումներ կայացնել,  ձևացնել՝ իբր ոչինչ չի եղել: Մենք այստեղ ենք, կամ դուք ձերբակալելու եք 3 մլն մարդու, կամ դուք հանգիստ չեք ունենալու մինչև Ձեր հրաժարականը»,- ասաց նա:

Ակցիային մասնակցող քաղաքացին նաև  հայտնեց, որ բողոքի ակցիաները շարունակական են լինելու, և  նոյեմբերի 21-ին էլ իրենք պատրաստվում են հավաքվել Ազատության հրապարակում: