Ռուսաստանի արտաքին գործերի նախարար Սերգեյ Լավրովը կարծում է, որ արցախյան պատերազմի ընթացքում զոհվածների մարմինների և գերեվարված անձանց փոխանակման գործընթացում պետք է իրավիճակի գույքագրում կատարել։

«Կնշեմ մի դրվագ, որի վրա մենք ուշադրություն ենք դարձնում։ Մարմինների և գերեվարված անձանց արդյունավետ փոխանակման համար անհրաժեշտ է գույքագրում անցկացնել այդ գործընթացում։ Ինչպես նաև, իհարկե, երկու կողմերի զինվորական հրամանատարությունը պետք է անհետ կորածների հստակ ցուցակներ ունենա, որպեսզի հնարավոր լինի ավելի առարկայական և ավելի ճշգրիտ զբաղվել այդ հարցով»,- ՌԴ արտաքին քաղաքական գերատեսչության ղեկավարի խոսքերն է մեջբերում РИА Новости-ն։

Հիշեցնենք, որ նոյեմբերի 9-ին Հայաստանի, Ադրբեջանի և Ռուսաստանի նախագահների ստորագրած համատեղ հայարարության 8-րդ կետի համաձայն՝ պետք է տեղի ունենա ռազմագերիների, պատանդների և պահվող այլ անձանց ու մահացածների մարմինների փոխանակում: Սակայն եռակողմ հայտարարությունում այս գործընթացի համար ժամկետներ նշված չեն։

Մինչև օրս հայկական և ադրբեջանական կողմերը վերը նշված կետով կատարում են միայն զոհվածների մարմինների փոխանակում։ Դիերի որոնողական աշխատանքները շարունակվում են, սակայն թե երբ հերթը կհասնի ռազմագերիների, պատանդների և պահվող այլ անձանց փոխանակմանը, դեռևս հայտնի չէ։

Լուսանկարը՝ ՌԴ ԱԳՆ մամուլի ծառայության