![](/static/articles/12/55/73/l-v0FI977jfG.jpg)
Վրաստանը սահմանային նոր ուղեկալ է կառուցում Ադրբեջանի սահմանին
Առաջիկայում Դավիթ Գարեջայի վանական համալիրի տարածքում, որը գտնվում է վրաց-ադրբեջանական սահմանին, կավարտվի սահմանային ուղեկալի կառուցումը, որը համապատասխանելու է ժամանակակից չափանիշներին։ Այդ մասին հայտարարել է Վրաստանի ներքին գործերի նախարարի ժամանակավոր պաշտոնակատար Վախթանգ Գոմելաուրին։
Նրա խոսքերով՝ սահմանային ոստիկանական ուղեկալը կառուցվում է ԱՄՆ պաշտպանության դեպարտամենտի վտանգների նվազեցման գրասենյակի (DTRA) աջակցությամբ։
Դավիթ Գարեջայի վանական համալիրը կռվախնձոր է Վրաստանի և Ադրբեջանի միջև։ Համալիրը բաղկացած է ժայռափոր 20 վանքերից և ընդգրկում է Վրաստանի երեք շրջանների տարածքները՝ Գարդաբանի, Սագարեջոյի և Սիղնաղի։ Համալիրի գլխավոր կոթողը Սուրբ Դավիթ Գարեջայի վանքն է, որը գտնվում է Ադրբեջանը և Վրաստանը բաժանող լեռան հյուսիսային լանջին։
Քանի որ վանական համալիրը գտնվում է երկու երկրների սահմանագծին, ԽՍՀՄ փլուզումից հետո երկու երկրները վիճարկում են վանական համալիրի պատկանելիության հարցը: Մի քանի անգամ եղել են դեպքեր, երբ ադրբեջանցի սահմանապահներն արգելել են վրացի զբոսաշրջիկներին այցելել Գարեջայի մայրավանք: Ադրբեջանական կողմը գտնում է, որ հուշարձանը Կովկասյան Ալբանիայի (Աղվանք) մշակութային ժառանգության մաս է և որևէ առնչություն չունի վրացիների հետ: Հատկանշական է, որ բարձունքը, որի վրա համալիրն է, Ադրբեջանի համար ունի ռազմավարական նշանակություն, ինչով էլ պայմանավորված է պատմական հուշարձանի խնդրի քաղաքական ենթատեքստը:
Լուսանկարը՝ Wikimedia Commons-ի
Մեկնաբանել