Երևանի ընդհանուր իրավասության դատարանը՝ նախագահությամբ դատավոր Վաչե Մարգարյանի, Գորիսի քաղաքապետ Առուշ Առուշանյանի ձերբակալման որոշումն ապօրինի է ճանաչել: Այս մասին դատարանի դիմաց լրագրողների հետ զրույցում ասաց Առուշանյանի փաստաբան Արմեն Մելքոնյանը: Առուշանյանը քիչ առաջ արդեն ազատ է արձակվել ձերբակալվածների պահման վայրից:

ՔԿ հաղորդագրության համաձայն՝ Առուշանյանը ձերբակալվել է Քրեական օրենսգրքի 34-225.1 հոդվածի 1-ին մասի հատկանիշներով արարք կատարելու կասկածանքով, այսինքն՝ օրենքով սահմանված կարգի խախտմամբ հավաք կազմակերպելու և անցկացնելու փորձ կատարելը:

Անդրադառնալով վարչապետ Նիկոլ Փաշինյանի՝ Սյունիք կատարվելիք աշխատանքային այցին՝ Առուշ Առուշանյանն ասել էր՝ թող գա Սյունիք ու կտեսնի, թե ոնց իրեն կդիմավորենք, իսկ երեկ՝ դեկտեմբերի 21-ին՝ վաղ առավոտից սյունեցիները փակել էին մուտքը Սյունիքի որոշ քաղաքներ: