Արարատի մարզի միջհամայնքային ուղղություները սպասարկող ուղևորափոխադրողները բարձրացրել են ուղեվարձը։ Սոցցանցերի տարբեր խմբերում, անձնական հաշիվներում մարդիկ թեման բարձրաձայնել են, ինչից հետո Քաղաքաշինության, տեխնիկական և հրդեհային անվտանգության տեսչական մարմինն արձագանքել է քաղաքացիների բողոքներին։

Ըստ Տեսչական մարմնի տարածած հաղորդագրության՝ ուղեվարձը թանկացել է անօրինական կերպով, ուղևորափոխադրող ընկերությունների ներկայացուցիչները ստացել են գրավոր նախազգուշացումներ, և տրվել է 5- օրյա ժամկետ՝ խախտումները շտկելու և օրենքով սահմանված փոխադրավարձով սպասարկում իրականացնելու համար։ Սակագները բարձրացրած ընկերություններն են՝ «Գալակտիկա տրանս սերվիս» ՍՊԸ-ն, Վեդու «ԲՈՒԱՏ» ՍՊԸ-ն և «Լիգա» ՍՊԸ-ն։

«Սահմանված ժամկետը լրանալուց հետո (մինչև հունվարի 15-ը, հեղ.) վերը նշված ընկերությունների կողմից խախտումը չշտկելու դեպքում Տեսչական մարմնի կողմից կկիրառվեն կոշտ պատասխանատվության միջոցներ՝ ընդհուպ մինչև երթուղու սպասարկման իրավունքից զրկում»,- նշված էր Տեսչական մարմնի տարածած հաղորդագրության մեջ։

Տեսչական մարմնից մեզ տեղեկացրին նաև, որ վաղը՝ հունվարի 13-ին, նախատեսում են հանդիպել Արարատի մարզի միջհամայնքային և ներհամայնքային ուղղությունները սպասարկող 9 ընկերությունների ներկայացուցիչների հետ, որտեղ նաև կքննարկվի ուղեվարձի բարձրացման հարցը։

Արփինե Խաչատրյանը Երևան-Քաղցրաշեն երթուղու ուղևոր է։ Երթուղին սպասարկում է «Լիգա» ՍՊԸ-ը, Արփինեին երթուղայինի վարորդն ասել է, որ 300 դրամի փոխարեն պետք է վճարի 350 դրամ, քանի որ ուղեվարձը թանկացել է։ Երբ Արփինեն կապվել է ընկերության ներկայացուցիչների հետ, նրան ասել են, որ նախկինում ընկերությունը ուղևորափոխադրում իրականացնելու հնարավորություն ստացել է 350 դրամով, բայց կատարել է 300-ով, իսկ հիմա, քանի որ պակասել է ուղևորահոսքը, և թանկացել է վառելիքը, որոշել են փոխադրումներ կատարել ըստ մրցույթում շահած գնի։ Վերջինս ֆեյսբուքյան տարբեր խմբերում հրապարակումներ է անում՝ փորձելով հարցին լուծում տալ։ 

Անօրինական կերպով ուղեվարձը բարձրացրած ընկերություններից պարզաբանում ստանալու նպատակով «Հետքը» կապ է հաստատել վերջիններիս հետ։ «Գալակտիկա տրանս սերվիս» ՍՊԸ-ի տնօրեն Շուշանիկ Խաչատրյանը հրաժարվեց պատասխանել մեր հարցերին։ Նշեց, որ զանգահարենք նրան վաղը՝ Տեսչական մարմնի ներկայացուցիչների հետ հանդիպումից հետո։ Ընկերությունը Արմավիրի մարզում սպասարկում է Երևան-Արմավիր ուղղությունը, Արարատի մարզում Երևան-Արտաշատ/451, Երևան-Արարատ/453, Վեդի-Երևան/459 ուղղությունները միկրոավտոբուսներով, իսկ Երևան-Խոր Վիրապ-Նոյակերտ/467 ուղղությունը՝ ավտոբուսով։ Վերը նշված բոլոր ուղղությունների համար ուղեվարձը թանկացել է 50 դրամով։  

«Լիգա» ՍՊԸ-ի շահագործման բաժնի պետ Խաչիկ Կարապետյանը մեզ հետ զրույցում նշեց, որ ուղեվարձի թանկացման պատճառը մեքենայի վառելիքի և պահեստամասերի թանկացումն է։ Վերջինիս խոսքով՝ դեռ 2000-ականներին ընկերությունը մրցույթում ուղևորափոխադրումներ իրականացնելու հնարավորություն ստացել է 300 դրամով, բայց մարդասիրական նպատակներից ելնելով՝ տարիներ շարունակ ուղևորափոխադրումներն արել է ավելի պակաս՝ 250 դրամով։

Ընկերությունը փոխադրումներ է իրականացնում Երևան-Մասիս, Երևան-Նորաշեն, Երևան-Քաղցրաշեն, Երևան-Արարատ, Երևան-Արտաշատ ուղղություններով։ Չի բարձրացել միայն Երևան-Նորաշենի ուղեվարձը։ «Լիգա» ՍՊԸ-ի վարորդ Արմեն Մաթևոսյանը մեզ հետ զրույցում նույնպես նշեց, որ թանկացման պատճառը վառելիքի գնի բարձրացումն է, նրա խոսքով՝ նվազել է նաև ուղևորահոսքը։

Վեդու «ԲՈՒԱՏ» ՍՊԸ-ի ներկայացուցիչ Անահիտ Մանուկյանը հերքեց այն լուրը, որ Վեդի-Երևան ուղղությունը սպասարկող ավտոբուսի ուղեվարձը թանկացել է՝ չնայած Տեսչական մարմնի ցուցակում նաև ներառված էր Վեդու «ԲՈՒԱՏ» ՍՊԸ-ն։ 

Այցելել ենք Երևանի «Սասունցի Դավիթ» կայարան, որտեղից էլ ընկերություններն իրականացնում են փոխադրումներ, «Գալակտիկա տրանս սերվիս» ՍՊԸ-ի կողմից սպասարկվող Երևան-Արտաշատ միկրոավտոբուսի ուղևորները նշեցին, որ դժգոհ են գների փոփոխությունից։ Բարդ է առավել ևս ուսանողների և Երևանում աշխատողների համար, որոնք ամեն օր ստիպված են օգտվել հասարակական տրանսպորտից։ Ոմանք չցանկացան ներկայանալ և խոսել, որովհետև վախենում են շրջապատի պիտակավորումներից և սոցցանցերում հայտնվելուց։

«Վեդի-Երևան» (Վեդու «ԲՈՒԱՏ» ՍՊԸ) ուղղության ավտոբուսի վարորդը, որը չցանկացավ ներկայանալ, սկզբում նշեց, որ գնի բարձրացում չի եղել, հետո ասաց, որ եղել է, բայց 1 օրով։ Ուղևորներն էլ հաստատեցին վարորդի խոսքը։ Ինչպես նախկինում, այնպես էլ հիմա ուղևորափոխադրումն իրականացվում է 350 դրամով։