Ադրբեջանի նախագահ Իլհամ Ալիևն ու Ռուսաստանի նախագահ Վլադիմիր Պուտինը շաբաթ օրը՝ հունվարի 30-ին կայացած հեռախոսազրույցի ժամանակ քննարկել են Արցախում հրադադարի պահպանման վերահսկողության ռուս-թուրքական միացյալ մոնիթորինգային կենտրոնի գործունեությունը։ Այդ մասին հաղորդագրություն է տարածել Ադրբեջանի նախագահի մամլո ծառայությունը։ 

«Իլհամ Ալիևը շնորհավորել է ռուս գործընկերոջը՝ Աղդամի շրջանում ռուս-թուրքական մոնիթորինգային կենտրոնի բացման կապակցությամբ։ Երկու երկրների առաջնորդներն ընդգծել են, որ մոնիթորինգային կենտրոնը կծառայի տարածաշրջանում երկարաժամկետ խաղաղության և կայունության ապահովման գործընթացին»,- նշվում է հաղորդագրության մեջ։ Նրանք կարևորել են նաև Մոսկվայում Ռուսաստանի, Ադրբեջանի և Հայաստանի առաջնորդների ձեռքբերված պայմանավորվածությունների կատարումը, որով նախատեսվում է տարածաշրջանում տրանսպորտային հաղորդակցությունների վերականգնում։

Նույն օրը Ալիևը հեռախոսազրույց է ունեցել նաև Թուրքիայի նախագահ Ռեջեփ Թայիփ Էրդողանի հետ։ Կողմերը դարձյալ քննարկել են ռուս-թուրքական միացյալ մոնիթորինգային կենտրոնի հարցը։ Ադրբեջանի նախագահի մամլո ծառայության տարածած հաղորդագրության մեջ նշվում է, որ Ալիևը շնորհավորել է Էրդողանին կենտրոնի բացման կապակցությամբ՝ նշելով, որ այն կծառայի տարածաշրջանում խաղաղության և անվտանգության ապահովմանը։

Կողմերը քննարկել են մոսկովյան պայմանավորվածությունների իրականացման ընթացքը, ինչպես նաև՝ Բաքվի վերահսկողության տակ անցած տարածքներում թուրքական ընկերությունների մասնակցությունը շինարարական աշխատանքներին։

Արցախում հրադադարի պահպանման վերահսկողության ռուս-թուրքական միացյալ մոնիթորինգային կենտրոնի ստեղծման մասին հուշագիրը ստորագրվել է 2020 թվականի նոյեմբերի 11-ին՝ ՌԴ Պաշտպանության նախարար Սերգեյ Շոյգուի և Թուրքիայի Ազգային պաշտպանության նախարար Հյուլուսի Աքարի բանակցությունների արդյունքում։

Նոյեմբերի 17-ին էլ Թուրքիայի խորհրդարանը հավանություն էր տվել նախագահի հրամանի նախագծին, որով ենթադրվում էր թուրքական ստորաբաժանումների ուղարկում Ադրբեջան։ Նախատեսվում է, որ թուրք զինծառայողների հերթափոխը տեղի կունենա ամեն տարի։

Լուսանկարը՝ Ադրբեջանի նախագահի մամլո ծառայության