![](/static/articles/12/70/86/l-REL0xl5q3R.jpg)
Բագարանի խմելու ջրի ծրագիրը չի իրականացվել համայնքի ֆինանսական դժվարությունների պատճառով
Արդեն երկու տարի է՝ Արմավիրի մարզի Բագարան համայնքում խոսում են խմելու ջրի նոր ցանց կառուցելու և համայնքը հոսող ջրով ապահովելու մասին: Նույնիսկ սուբվենցիոն ծրագրով հայտ է ներկայացվել, ծրագիրն արժանացել է հավանության: Սակայն, տարիներ շարունակ խոսակցություններն ու ծրագրերն այդպես էլ իրականություն չեն դառնում:
Արմավիրի մարզպետարանից մեզ փոխանցեցին, որ 2020թ. ընթացքում հավանության արժանացած մարզի 3 սուբվենցիոն ծրագիր չեղարկվել է համայնքների ղեկավարների գրությունների հիման վրա: Այդ ծրագրերից մեկն էլ Բագարան համայնքի խմելու ջրամատակարարման համակարգի կառուցում է:
Մարզպետարանի փոխանցմամբ՝ ծրագիրը չի իրականացվել համայնքի ֆինանսական միջոցների բացակայության պատճառով:
Նշենք, որ Բագարանի խմելու ջրի ծրագրի նախագծանախահաշվային արժեքը կազմում է շուրջ 233.3 մլն դրամ: 2020թ. համար ծրագրի բյուջեն կազմել է 106.5 մլն դրամ, որից պետական բյուջեի մասնաբաժինը 70% է՝ 74 մլն 540 հազար դրամ, համայնքի մասնաբաժինը՝ 30%՝ 31 մլն 946 հազար դրամ:
Համայնքում խմելու ջրի մատակարարման համակարգի կառուցման ծրագիրը պետք է իրականացվեր երկու փուլով՝ 2020-2021թթ. ընթացքում: Առաջին փուլը պետք է ընդգրկեր աղբյուրակապի և դրանից սնուցվող ջրագծի, իսկ երկրորդը՝ ջրամատակարարման ցանցի և մուտքագծերի կառուցումը:
Ծրագիրն իրականություն դառնալու դեպքում շուրջ 160 տնտեսություն կապահովվի որակյալ, սանիտարահիգիենիկ նորմերին համապատասխան խմելաջրով:
Բագարանի խմելու ջրի ներքին ցանցը տարիների ընթացքում այնքան է մաշվել, որ դարձել է օգտագործման համար ոչ պիտանի: Այդ է պատճառը, որ համայնքում կառուցվում է ամբողջովին նոր ջրագիծ և ներքին ցանց:
Հիշեցնենք, «Հետքն» անդրադարձել է Բագարան համայնքի խմելու ջրի թեմային: Գրել էինք, որ բագարանցիները խմելու ջուրը տարաներով տանում են «Գորտի աղբյուր» կոչվող վայրից: Իսկ լողանալու կամ ամանները լվանալու, կենցաղում օգտագործելու համար օգտագործում են առվի ջուրը:
Բագարանցիները կենցաղում օգտագործում են նույնիսկ գետի ջրերը: Մի քանի հարևաններով գետի ջուրը խողովակներով բերում են իրենց բակեր և պոմպի միջոցով աշխատեցնում են ջրատաքացուցիչները, որ գոնե կարողանան լողանալ: Սակայն, ջրատաքացուցիչները կարողանում են տարվա ընթացքում մի քանի ամիս օգտագործել: Ձյան կամ անձրևի ջրերը պղտորում են գետը, և այդ ջուրը օգտագործել հնարավոր չէ:
Բագարանի համայնքապետ Գևորգ Մարգարյանը «Հետք»-ի հետ զրույցում ասաց, որ մի քանի օր առաջ դարձյալ դիմել է մարզպետարան համայնքի խմելու ջրի ծրագիրը կյանքի կոչելու նպատակով: Համայնքապետի խոսքերով՝ կորոնավիրուսի և 2020թ. սեպտեմբերի 27-ին Ադրբեջանի կողմից Արցախում սանձազերծված պատերազմի հետևանքով ֆինանսական դժվարություններ են ունեցել և չեն կարողացել ծրագիրն իրականացնել:
«Բայց արդեն առաջին փուլի գումարն ունենք: Նորից դիմել եմ՝ ծրագիրն իրականացնելու համար: Սպասում ենք պատասխանին»,- ասաց Բագարանի համայնքապետը:
Մեկնաբանել