HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Երևան համայնքը ուրիշի հողում խաղահրապարակ է կառուցել, հետո՝ քանդել, ապա նորից՝ հավաքել

Հունվարի վերջին օրերին Շենգավիթ 2-րդ փողոցի 1-ին շենքի դիմացի խաղահրապարակի ապամոնտաժման փորձերը հարակից շենքերի բնակիչների բուռն արձագանքի արժանացան։ Խաղահրապարակը ապամոնտաժվեց, սակայն մի քանի օր անց խաղասարքերը վերադարձան իրենց սկզբնական տեղերը։

«Հետք»-ը պարզել է, թե ինչ հիմքով, երբ և ում կողմից է խաղահրապարկը ապամոնտաժվել և ինչու։

Երևանի նախկին քաղաքապետ Տարոն Մարգարյանի պաշտոնավարման ժամանակ՝ 2015 թ.-ին, Վերին Շենգավիթ 2-րդ փողոցի 1-ին շենքի դիմաց գտնվող 65 քմ հողակտորը աճուրդով վաճառվել է։ Աճուրդում հաղթող ճանաչված Անդրանիկ Պետրոսյանը 1 միլիոն 701 դրամ է վճարել Երևան համայնքի բյուջե հողը ձեռքբերելու համար։ Հողը գնելուց երեք շաբաթ անց Պետրոսյանը այն վաճառել է մեկ այլ անձի՝ Արտեմ Գրիգորյանին։ Նոր գնորդն էլ իր հերթին է հողը վաճառել։ Երրորդ գնորդը Արցախի փաստաբանների պալատի անդամ, փաստաբան Արման Բաղրյանն է։ Հենց նրա պահանջով կայացած դատավճռի հիման վրա քաղաքապետ Հայկ Մարությանի որոշմամբ ապամոնտաժվում է խաղահրապարակը։

Խաղահրապարակը կառուցվել է մասնավորեցված հողի վրա

Վերին Շենգավիթ 2-րդ փողոցի 1-ին շենքի դիմաց գտնվող 703 քմ հողակտորի վրա 2017թ․-ին որոշվել է մանկական խաղահրապարակ կառուցել Երևան համայնքի միջոցներով։ Քաղաքապետարանից մեզ հայտնեցին, որ խաղահրապարակի կառուցումն արժեցել է 8 միլիոն 250 հազար դրամ։ Խաղահրապարակը կառուցվել է նաև Արման Բաղրյանին պատկանող 65 քմ (ներառվում է 703 քմ-ում) հողակտորի վրա։

Նույն տարում Բաղրյանը դիմել է վարչական դատարան և պահանջել ոչ իրավաչափ ճանաչել իր հողամասը խաղահրապարակի վերածելու քաղաքապետարանի գործողությունները։ Այդ հողի վրա տեղադրվել էր 4 հատ մարզասարք, 2 հատ նստարան, 2 հատ լուսարձակ։

Պարզվել է, որ 2015 թ-ին հողն աճուրդով գնած Անդրանիկ Պետրոսյանը Երևանի քաղաքապետարանից ստացել է ճարտարապետահատակագծային առաջադրանք։ Պողոսյանը հողը վաճառել է Արտեմ Գրիգորյանին, որն էլ մեկ տարի անց՝ 2016 թ-ի նոյեմբերի 30-ին, վաճառել է այն Արման Բաղրյանին։

2017 թ.-ի ապրիլի 21-ին Արման Բաղրյանը դիմել է Երևանի քաղաքապետարան, որպեսզի շինթույլտվություն ստանա գրասենյակ կառուցելու համար։ Այդ ժամանակվա քաղաքապետ Տարոն Մարգարյանը 2017թ. հունիսի 5-ին Բաղրյանին տվել է շինթույլտվություն։ Բաղրյանը փորձել է սկսել գրասենյակի շինարարությունը, բայց այցելելով հողամաս, պարզել է, որ քաղաքապետարանը իր հողամասում խաղահրապարակ է կառուցում։ Բազմաթիվ դիմումներից հետո, որ դադարեցնեն շինարարությունը, քաղաքապետարանը Բաղրյանին առաջարկել է այլ հողամաս տրամադրել։ Շենգավիթ վարչական շրջանում առաջարկվող հողմասն էլ հետագայում պարզվել է, որ Հայաստանի էլեկտրական ցանցեր ընկերությանն է պատկանում։ Սեփականատերը ստիպված ինքն է 21 հատ hողամաս դիտարկել և առաջարկել քաղաքապետարանին՝ փոխանակել իր հողի հետ։ Այդ հարցով քննարկումներն այդպես էլ արդյունք չեն ունեցել։ 

Մենք ուսումնասիրեցինք 2017 թ․-ին Երևան քաղաքում տրամադրված շինթույլտվությունների ցանկը և պարզվեց, որ այդ խաղահրապարակը կառուցելու համար շինթույլտվություն չի տրամադրվել։

2018 թ-ի ապրիլին վարչական դատարանը որոշել է բավարարել Արման Բաղրյանի հայցը, և ոչ իրավաչափ է ճանաչել 65 քմ հողակտորի վրա քաղաքապետարանի կողմից խաղահրապարակ կառուցելու գործողությունները։

Կրկին դատական ակտ Երևանի քաղաքապետարանի դեմ

Արման Բաղրյանը վարչական դատարանի 2018 թ–ի վճիռը ստանալուց հետո դիմել է Երևանի քաղաքապետարանին՝ փոխհատուցում ստանալու կամ համարժեք հողատարածք տրամադրելու նպատակով։ Բաղրյանն արտադատական կարգով արդյունքի չհասնելուց հետո կրկին դիմել է վարչական դատարան։ Դատարանը 2019 թ–ին վճռել է Բաղրյանի հայցը բավարարել և պարտավորեցրել է Երևան համայնքին կայացնել 65 քմ հողամասի նախկին դրությունը վերականգնելու եղանակով վնասի հատուցման վերաբերյալ վարչական ակտ։ Քաղաքապետարանը բողոքարկել է, սակայն Վարչական վերաքննիչ դատարանն անփոփոխ է թողել առաջին ատյանի դատարանի վճիռը։

Երևանի քաղաքապետ Հայկ Մարությանը դատական ակտի հիման վրա 2020 թ–ի սեպտեմբերի 7–ին ընդունել է համար 2744-Ա որոշումը։ Որում ասված է․ «Հատուցել Արման Բաղրյանին պատճառված վնասը՝ Երևան քաղաքի Շենգավիթ վարչական շրջանի Վերին Շենգավիթի 2-րդ փողոցի հ.1/8 հասցեում գտնվող 65 քմ հողամասի նախկին դրությունը վերականգնելու եղանակով»։

Երևանի քաղաքապետարանից մեր գրավոր հարցման ի պատասխան հայտնեցին, որ 2744-Ա որոշման կատարումը դրվել է Շենգավիթ վարչական շրջանի ղեկավարի, քաղաքապետարանի քաղաքաշինության և հողի վերահսկողության վարչության, հասարակական կարգի պահպանության ծառայության պետի վրա։ Միաժամանակ նշել են, որ որոշման պահանջները կատարվել են։ 

Այցելեցինք խաղահարապարակ և տեսանք, որ ապամոնտաժված խաղահրապարակը իր նախնական տեսքի է բերվել՝ խաղասարքերը տեղում են և զարմանալի է, թե ինչպես է քաղաքապետարանը պատասխանում, որ որոշման պահանջները կատարվել են։ 

Բացի այդ մենք տեղեկացել էինք հարակից շենքերի բնակիչներից, որ քաղաքապետարանը բանակցում է հողի սեփականատիրոջ հետ՝ նրան այլ հող հատկացնելու նպատակով։ Բանակցությունների վերաբերյալ մեր գրավոր հարցին քաղաքապետարանից չեն պատասխանել։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter