HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Ղուկասյան

Վարչապետը չպատասխանեց «Իսկանդերի» և Օնիկ Գասպարյանի մասին հարցերին

Խորհրդարանի հերթական նիստում մեկնարկել է Ազգային ժողով-Կառավարություն հարցուպատասխանը: Չնայած վարչապետ Նիկոլ Փաշինյանը ներկա է նիստին, և մի քանի հարց հնչեց նրան ուղղված՝ վերջինս դեռ չի պատասխանում որևէ հարցի:

«Լուսավոր Հայաստան» խմբակցության պատգամավոր Արկադի Խաչատրյանը հարցրեց «Իսկանդեր» հրթիռային համակարգի` պատերազմի ժամանակ կիրառության մասին վարչապետի հայտնի արտահայտությունից` հետաքրքրվելով, թե ի վերջո պատերազմի ժամանակ այն կիրառվե՞լ է, թե՞ ոչ: Պատգամավորը նաև հետաքրքրվեց, թե վարչապետը նման արտահայտություն անելիս կանխատեսել է արդյոք Մոսկվայի արձագանքը, նման հայտարարությունն արվել է գիտակցվա՞ծ, թե՞ չհաշվարկված:

Հարցին պատասխանեց փոխվարչապետ Տիգրան Ավինյանը` ընդգծելով, որ բոլոր պարզաբանումները ներկայացվել են թե՛ հայկական, թե՛ ռուսական կողմից:

Պատգամավորը շարունակեց` «Իսկանդեր» հրթիռային համակարգը ռուսական բանակի մատունակության կարևոր հենասյունն է, երբ հայտարարվում է, որ այն պայթում է 10 %-ով, ու այդ հայտարարությունն արվում է ոչ թե շարքային քաղաքական գործչի կողմից, այլ այդ համակարգն ունեցող երկրի առաջնորդի, չէր կարող Մոսկվայի վրդովմունքը չառաջացնել:

Ավինյանն արձագանքեց` հարցը պարզաբանված է, ավելացնելու ոչինչ չկա:

«Լուսավոր Հայաստան» խմբակցության ղեկավար Էդմոն Մարուքյանն անդրադարձավ մարտի 1-ի հանրահավաքի ժամանակ Փաշինյանի այն հայտարարությանը, որ զինված ուժերի շտաբի պետ Օնիկ Գասպարյանը նրա հրաժարականն է պահանջել Սերժ Սարգսյանի ցուցումով: Մարուքյանը հրապարակային պարզաբանում պահանջեց` պնդելով, որ վարչապետը ասվածի վերաբերյալ փաստեր պետք է ներկայացնի:

Այս հարցին ևս Տիգրան Ավինյանը պատասխանեց. «Ձեր բարձրաձայնած հարցի կապակցությամբ չեմ կարծում, որ հավելյալ պարզաբանման կարիք կա: Վարչապետը որքանով հարկ է համարել, այդ չափով է հայտարարություն արել, եթե լինի հավելյալ պարզաբանման կարիք, կանդրադառնա»,- ասաց Ավինյանը։

«Լուսավոր Հայաստան» խմբակցության պատգամավոր Անի Սամսոնյանն էլ անդրադարձավ Զինված ուժերի գլխավոր շտաբի մի շարք բարձրաստիճան զինվորականների հայտարարությանը` ընդգծելով, որ շտաբը նման որոշում հապշտապ չէր կայացնի, և ունեցել է ծանրակշիռ պահանջներ:

«Դուք որպես գերագույն հրամանատար՝ ինչքան անադեկվատ որոշումներ եք կայացրել, որքան սահմաններ եք հատել, որ գլխավոր շտաբը որոշել է, որ ի վիճակի չեք երկիրը ղեկավարել, այլ ելք չկա, և պետք է հրաժարական տաք»,- ասաց նա` դիմելով Փաշինյանին:

Այս հարցին ևս Տիգրան Ավինյանը պատասխանեց` ընդգծելով, որ Կառավարության լիազորությունն է հարցին պատասխանողին ընտրել: Ավինյանի խոսքով` շտաբի հայտարարությունը բավականին խնդրահարույց է այն առումով, որ զինվորականները, հատկապես` շտաբի պետը, Սահմանադրության համաձայն՝ քաղաքականությանը չպետք է առնչվեն, և քաղաքական հայտարարությունները որևէ կերպ չեն մտնում շտաբի գործառույթների մեջ:

«Փաստ ունենք, դրա հետ կապված քննարկումներ եղել են, լուծման ճանապարհը ուրվագծվում է»,- ասաց Ավինյանը:

Հիշեցնենք, որ հանրապետության նախագահը չի ստորագրել շտաբի պետին պաշտոնից ազատելու հրամանագիրը, և դիմելու է Սահմանադրական դատարան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter