Ազգային անվտանգության ծառայության գնդապետ Սերոբ Հարությունյանի նկատմամբ իրականացվող քրեական հետապնդումը դադարեցվել է՝ արդարացնող հիմքով։ Այս մասին հայտնում է փաստաբան Երեմ Սարգսյանը։

Հիշեցնենք, որ 2020 թվականի փետրվարի 13-ին «hraparak.am» կայքում հրապարակվել էր «Սուրեն Պապիկյանը թաքցրել է իր դատվածության փաստը» վերտառությամբ հոդված, ըստ որի՝ Տարածքային կառավարման և ենթակառուցվածքների նախարար Սուրեն Պապիկյանը դատվածություն է ունեցել ծառայության տարիներին և այս հագնամանքը թաքցրել է իր կենսագրությունից:

Դեպքի առթիվ Հատուկ քննչական ծառայությունում քրեական գործ էր հարուցվել։ Մոտ երկու շաբաթ անց Սերոբ Հարությունյանին, ով այդ ժամանակ ԱԱԾ հակահետախուզության դեպարտամենտի իրավապահ համակարգի սպասարկման և վերահսկման բաժնի պետն էր, պաշտոնեական դիրքի չարաշահման մեղադրանք էր առաջադրվել, նրա պաշտոնավարումը ժամանակավորապես դադարեցվել էր։

Երեմ Սարգսյանի խոսքով՝ մոտ մեկ տարի տևած քննության արդյունքում, ի վերջո, հաստատվել է, որ Սերոբ Հարությունյանը ոչ միայն պաշտոնեական դիրքի չարաշահում, այլև՝ ընդհանրապես պետական ծառայության դեմ ուղղված որևէ հանցագործություն չի կատարել, ուստի կայացվել են նրա նկատմամբ քրեական հետապնդումը դադարեցնելու և քրեական հետապնդում չիրականացնելու մասին որոշումներ՝ հանցակազմի բացակայության հիմքով։

Այսինքն, Սերոբ Հարությունյանն արդարացվել է, ունի արդարացվածի կարգավիճակ։

Պաշտպանը, հղում կատարելով ՀՀ քրեական դատավարության օրենսգրքի 66-րդ հոդվածին, որը վերաբերում է արդարացվածի իրավունքներին, նշում է, որ Սերոբ Հարությունյանը պետք է վերականգնվի իր նախկին պաշտոնում և ստանա նախորդ մեկ տարվա աշխատավարձը։

Նշենք, որ թեև Սերոբ Հարությունյանի նկատմամբ քրեական հետապնդումը դադարեցվել է, գործի քննությունը շարունակվում է։

Լուսանկարում՝ Սերոբ Հարությունյանը