Լեռնային Ղարաբաղում տեղակայված ռուսական խաղաղապահ զորախմբի հումանիտար ականազերծման վաշտի ինժեներասակրավորական խմբերը շարունակում են մաքրել Արցախի տարածքը պայթյունավտանգ առարկաներից։

Ինչպես հաղորդում է Ռուսաստանի Դաշնության պաշտպանության նախարարությունը (ՌԴ ՊՆ), ներկա դրությամբ ռուս սակրավորները ականազերծման աշխատանքներ են կատարում Կարմիր Շուկա բնակավայրի մոտակայքում։ Գյուղատնտեսական հողերը, որոնք նախկինում տեղի բնակիչները մշակել են, պատերազմի ընթացքում հրետանային հարվածների տակ են եղել։

Հումանիտար ականազերծման ստորաբաժանման զինծառայողները պայթյունավտանգ իրերից մաքրել են 5 հեկտար գյուղատնտեսական հող։ ՌԴ ՊՆ-ի փոխանցմամբ՝ կատարված աշխատանքների շնորհիվ տեղի ֆերմերները կարող են վերադառնալ և շարունակել թթենիների այգու մշակումը։

2020թ․ նոյեմբերի 23-ից սկսած ռուսական խաղաղապահ զորախմբի սակրավորները չպայթած զինամթերքից մաքրել են 2012 հեկտար տարածք, 620 կմ ճանապարհ, 1716 բնակելի շինություն, այդ թվում՝ սոցիալական նշանակության 30 օբյեկտ։ Հայտնաբերվել և վնասազերծվել է 25 580 պայթյունավտանգ առարկա։

***

2020թ․ նոյեմբերի 9-ի երեկոյան Հայաստանի, Ադրբեջանի և Ռուսաստանի ղեկավարների ստորագրած հայտարարությամբ՝ Արցախում մարտական գործողությունները դադարեցվեցին։ Համաձայն այդ փաստաթղթի՝ հայկական կողմը մինչև դեկտեմբերի 1-ը Ադրբեջանին հանձնեց Քելբաջարի, Աղդամի և Լաչինի շրջանները։

Լեռնային Ղարաբաղում շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորախումբը:

Լաչինի միջանցքը (5 կմ լայնությամբ), որն ապահովում է Արցախի կապը Հայաստանի հետ՝ ընդ որում շրջանցելով Շուշի քաղաքը, մնաց Ռուսաստանի խաղաղապահ զորակազմի վերահսկողության ներքո:

Զորախմբի հիմնական մասը կազմում են ՌԴ զինված ուժերի Կենտրոնական ռազմական օկրուգի 15-րդ առանձին մոտոհրաձգային բրիգադի զինծառայողները։