Քաղաքացի Նարեկ Կարապետյանը Սյունիքի մարզում տեղի ունեցած դեպքերի առթիվ քննվող քրեական գործով կասկածյալի կարգավիճակ ունի, այժմ ձերբակալված է։ Տան անդամներից տեղեկանալով, որ ոստիկանությունը եկել է իրենց հասցեով, ինքնակամ ներկայացել է Քննչական կոմիտե, կազմվել է համապատասխան արձանագրություն այն մասին, որ Կարապետյանն ինքնակամ է ներկայացել, ապա քննիչը որոշել է նրան ձերբակալել՝ փախուստը կանխելու նպատակով։

Այս մասին «Հետք»-ի հետ զրույցում ասաց Կարապետյանի պաշտպան Միքայել Շխիմյանը։ Պաշտպանը հայտնեց, որ Նարեկ Կարապետյանը կասկածվում է  Քրեական օրենսգրքի 3-րդ մասի 1-ին, 2-րդ և 5-րդ կետերով նախատեսված արարք կատարելու մեջ, այսինքն՝ խուլիգանությունը, որը կատարվել է մի խումբ անձանց կամ կազմակերպված խմբի կողմից, զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով և բացառիկ ցինիզմով։ Կարապետյանին վերագրվող կասկածանքը վերաբերում է Նիկոլ Փաշինյանի՝ Մեղրի այցի ընթացքում բողոքի ակցիաների ժամանակ տեղի ունեցած իրադարձություններին։

Հիշեցնենք, որ Նիկոլ Փաշինյանի՝ ապրիլի 20-ին և 21-ին Սյունիք կատարած այցի ընթացքում մարզի մի շարք համայնքներում բողոքի ակցիաներ են տեղի ունեցել, որոնց առթիվ հարուցված քրեական գործի շրջանակներում այս պահին ձերբակալված անձինք կան։

Լուսանկարում՝՝ Միքայել Շխիմյանը