Ապրիլի 22-ի դրությամբ Սյունիքի մարզում հուղարկավորվել է 212 զինծառայող: Հուղարկավորվածների զգալի մասը եղել է Սիսիան համայնքից: Այս մասին «Հետք»-ին տեղեկացրել են Սյունիքի մարզպետարանից:

Մարզպետարանը, հիմք ընդունելով համայնքապետարաններից ստացված տեղեկատվությունը, իրականացնում է Արցախի 44-օրյա պատերազմի հետևանքով մարզի բնակիչ հանդիսացող զոհված և հուղարկավորված զինծառայողների հաշվառում:

Ըստ այդ տեղեկատվության՝ Կապան համայնքից հուղարկավորվել է 51 զինծառայող, Գորիսից՝ 37, Սիսիանից՝ 67, Քաջարանից՝ 19, Մեղրիից՝ 18, Տեղ համայնքից՝ 10, Տաթևից 7 և Գորայք համայնքից 3 զինծառայող: Հրետակոծության հետևանքով զոհվել է նաև Կապան համայնքի մեկ քաղաքացիական անձ:

Պատերազմի հետևանքով բոլոր զոհվածներն ազգությամբ հայեր են:

Սյունիքի մարզպետարանը չունի տեղեկություներ, թե հուղարկավորված զինծառայողներից քանիսն են եղել ժամկետային զինծառայողներ, պայմանագրայիններ, կամավորներ և այլն:

Հիշեցնենք, որ պատերազմի հետևանքով Սյունիքի մարզն ունեցել է նաև գույքային կորուստներ: Մասնավորապես, մարզում վնասվել է 142 շենք-շինություն՝ Դավիթ Բեկ և Ներքին Խնձորեսկ բնակավայրերում:

Ամենաշատ տները վնասվել են Կապան համայնքի Դավիթ Բեկ բնակավայրում: Վնասվել են 93 տուն, շենք-շինություն՝ պատճառելով 36 մլն 537 հազար դրամի վնաս: Իսկ Ներքին Խնձորեսկում վնասվել է 49 անշարժ գույք, որի հետևանքով քաղաքացիներին պատճառվել է 13 մլն 605 հազար դրամի վնաս:

Ներկայացված վնասները չեն ներառում Շուռնուխ և Որոտան բնակավայրերում իրենց տունը կորցրած ընտանիքների գույքային վնասները: Այս բնակավայրերում քաղաքացիները տնից զրկվել են ոչ թե ռմբակոծության հետևանքով, այլ տարածքների ճշգրտման պատճառով: