Եվրոպայի խորհրդի խորհրդարանական վեհաժողովի (ԵԽԽՎ) զեկուցող Փոլ Գավանը մայիսի 19-22-ը Միգրացիայի, փախստականների և բնակչության հարցերով հանձնաժողովի հանձնարարությամբ կլինի Երևանում հայ-ադրբեջանական հակամարտության մարդասիրական հետևանքները ուսումնասիրելու համար։ Այցի արդյունքներով Փոլ Գավանը այդ թեմայով զեկույց կնախապատրաստի։

Նա հանդիպումներ է ունենալու ԱԺ պատգամավորների, այդ թվում՝ ԱԺ նախագահի հետ, ինչպես նաև տարբեր նախարարությունների ներկայացուցիչների, որոնք զբաղվում են հակամարտության մարդասիրական հետևանքներով։ Ըստ ԵԽԽՎ հաղորդագրության՝  Փոլ Գավանը նաև հնարավորություն կունենա լսելու տեղահանված անձանց, գերիների և անհետ կորածների ընտանիքներին, և կհանդիպի հոգևոր առաջնորդներին, Մարդու իրավունքների պաշտպանին և քաղաքացիական հասարակության ներկայացուցիչներին։

«Այցը նաև թույլ կտա նրան ավելի լավ հասկանալու Հայաստանում այդ հարցերով զբաղվով միջազգային  կազմակերպությունների դերը և ներդրումը, այդ թվում Կարմիր խաչի միջազգային կոմիտեի (ԿԽՄԿ), ՄԱԿ-ի գործակալությունների, մասնավորապես ՄԱԿ-ի փախստականների հարցով գերագույն հանձնակատարի գրասենյակի»,- հայտնում է ԵԽԽՎ-ն։

Փոլ Գավանը լրացուցիչ տեղեկությունների համար ամռանը կայցելի նաև Ադրբեջան: Նա կավարտի իր զեկույցը աշնանը։

Լուսանկարը՝ Sinn Féin-ի