Գարիկ  - Պարոն Քոքոբելյան, Ձեր ղեկավարած կուսակցությունն ընդամենը մեկ տարեկան է, բայց արդեն ԱԺ մտնելու ցանկություն եք հայտնում: Ինչպե՞ս Ձեզ հաջողվեց այս ամենը, երբ տարիներով գործող կուսակցությունները քայլ չեն անում դեպի մեծ քաղաքականություն: Ձեր կուսակցությանը ինչ-որ դրսի ուժ հովանավորու՞մ է:

Հարգելի Գարիկ, շնորհակալ եմ գրագետ ձևակերպված հարցի համար: Այո, խոսքը մեծ քաղաքականության մասին է, քաղաքականություն, որով զբաղվող քաղաքական ուժերի գոնե գործող առաջին դեմքերը, իմ կարծիքով, պետք է լինեն ռեալ քաղաքական գործիչներ, ունենան մեծ փորձ քաղաքականության ոլորտում, լումա ունենան ներդրած մեր պետության ձևավորման և դրա զարգացմանը նպաստող գործընթացներում, այդ թվում` մարդու իրավունքների ու ազատությունների համար պայքարում, ազատության և ժողովրդի իշխանության հաստատմանն ուղղված այլ գործընթացներում: Կարևոր է նաև, որ քաղաքականության մեջ լինեն ոչ միայն ինտելեկտուալ ու բանիմաց, այլև ունենան բավարար համարձակություն ու վճռականություն և լինեն բոլորի ու յուրաքանչյուրի խնդիրներով մտահոգ գործիչներ:

Այս բնութագրիչները կամ հատկանիշներն արտացոլում են մարդու անցած ուղին, նրա քաղաքական կենսագրությունը, ինչը որևէ կերպ հնարավոր չէ ջնջել կամ մոռացության տալ, կամ տարբեր ուժերի շահերին ծառայելու նպատակներից ելնելով` աղավաղել:

Այս տեսակետից, ճիշտ է` «Ազատ դեմոկրատներ» կուսակցությունը նոր կուսակցություն է, սակայն նրանում կան և երիտասարդներ, և, ինչու չէ, մարդիկ, որոնք քաղաքականության մեջ իրենց առաջին քայլերն են կատարում, որոնցով մենք հպարտանում ենք, և կան փորձառու քաղաքական գործիչներ, մարդիկ, ովքեր ունեն քաղաքական մեծ փորձառություն և քաղաքականության մեջ են այնքան ժամանակ, ինչքան գոյություն ունի մեր նորանկախ պետությունը:

Այդ մարդիկ իրենց քաղաքական գործունեության ընթացքում երբեք չեն փոխել իրենց սկզբունքները, իրենց գաղափարական հենքը, իրենց հայացքների համար քաղաքական հետապնդումների և տարաբնույթ ճնշումների են ենթարկվել, նույնիսկ դարձել են քաղաքական բանտարկյալներ, անցած տարիների ընթացքում միշտ եղել են մեր պետության ժողովրդավարացմանն ու նրանում ազատականության հաստատմանն ուղղված քաղաքական գործընթացների կիզակետում և իրենց քաղաքական փորձառությամբ ու քաղաքական մենեջմենթի առումով եղել են նաև այդ գործընթացների կազմակերպիչները:

Մյուս կողմից, քաղաքականության մեջ պակաս կարևոր չէ, որ քաղաքական ուժերը և քաղաքական գործիչները ռեալ հնարավորություն ունենան հավասար մրցակցային պայմաններում ներկայացնելու իրենց ծրագրերը, նպատակները և դրանց հասնելու մեթոդները: Սա հատկապես դժվարանում է մեր ներկայիս իրավիճակում և գործող քաղաքական համակարգի պայմաններում, որտեղ տեղ չունեն քաղաքակիրթ բանավեճերն ու քննարկումները, քաղաքական ծրագրեր ներկայացնելն ու առողջ մրցակցությունը, իսկ ազատությունը, հատկապես խոսքի ազատությունը, հաճախ շփոթվում է այլասերության, գռեհկության և ագրեսիվության հետ:

Արդյունքում ունենք ոչ միայն ֆիզիկապես և իրավական առումով չպաշտպանված քաղաքացիներ (դա միշտ էլ ունեցել ենք), այլ նաև արդեն բարոյապես չպաշպանված հասարակություն, երբ ամեն ոք ամեն պահի կարող է իր վառ երևակայությունը, հորինվածքները, ենթադրությունները բարձրաձայնել և հրամցնել հասարակությանը` անցնելով բոլոր բարոյական նորմերն ու էթիկան` դրանով իսկ բարոյապես վնասելով ոչ միայն կոնկրետ անձի, այլև հասարակությանն առհասարակ:

Ի դեպ, սա վերաբերում է թե' քաղաքական, թե' այլ հարաբերություններում նման երևույթների առկայությանը: Սա շատ ավելի վտանգավոր և ծանր հետևանքներ ունեցող արատավոր երևույթ է, քան, օրինակ, նյութական վնաս պատճառելը: Պետք չէ հասարակության մեջ սերմանել ատելության և ագրեսիվության տարրեր, դա, ի վերջո, բումերանգի պես հետ է գալու և հանգեցնելու է հասարակության` առանց այն էլ ձևախեղված բարոյական արժեհամակարգի էլ ավելի ձևախեղմանը:

Ինչևէ, մենք՝ ազատ դեմոկրատներս, միշտ հավատարիմ ենք մեր սկզբունքներին, ի շահ անհատի, ազատականության և ժողովրդավարության որդեգրած մեր գաղափարներին: Ավելին, աշխարհաքաղաքական նոր զարգացումներին համահունչ` ներկայումս մենք արդիականացրել ենք մեր պայքարի մարտավարությունը` ակտիվ քաղաքականության նո'ր փուլ մտնելով նո'ր կուսակցությամբ, հանուն նո'ր Հայաստանի: «Ազատ դեմոկրատները» նոր ուժ է նոր Հայաստանի համար: Լինելով նոր ուժ նոր Հայաստանի համար՝ ձևավորելու ենք որակապես նոր քաղաքական մշակույթ:

Մենք գտնում ենք, որ քաղաքական համակարգը պետք է լինի սոցիալապես արդյունավետ: Այն պետք է հարմարացվի հասարակության պահանջներին, այլ ոչ թե հակառակը: Մենք արդիականացնելու ենք նաև քաղաքացու քաղաքական մասնակցության ձևերն ու մեխանիզմները` լինելով բաց ու թափանցիկ մեր գործունեության մեջ և ապահովելով քաղաքացու տեղեկացվածության և հատկապես` ճշգրիտ տեղեկացվածության իրավունքը քաղաքական բոլոր գործընթացներին:

Վստահաբար կարող ենք փաստել, որ այսօր` կուսակցության ստեղծումից կարճ ժամանակ անց, մենք ունենք համախոհների մեծ բանակ:

Ձեր հարցի երրորդ մասի կապակցությամբ նշեմ, որ այստեղ որևէ դրսի ուժերի մասին խոսք լինել չի կարող: Դա, կարծում եմ, վաղուց իրեն սպառած, չգործող, պարզունակ հնարք է: Բազմիցս փորձել են և փորձում են «Ազատ դեմոկրատներին» «սև PR»-ի շրջանակներում կապել «դրսի ուժերի» հետ, և ես առիթ ունեցել եմ այդ հարցին սպառիչ պատասխան տալու, բայց ևս մեկ անգամ կրկնում եմ, որ մենք՝ «Ազատ դեմոկրատներ»-ում միավորված քաղաքական գործիչներս, մեր ամբողջ քաղաքական գործունեության ընթացքում ապացուցել ենք մեր ով լինելը, այս ողջ ընթացքում պայքարել ենք ՀՀ-ում ազատականության և դեմոկրատիայի հաստատման համար, պայքարել ենք ՀՀ քաղաքացու իրավունքների համար, ՀՀ քաղաքացիներին թե՛ քաղաքական, թե՛ տնտեսական դաշտում ազատ մրցակցային պայմաններ ապահովելու համար: Ես գտնում եմ, որ ՀՀ ամենամեծ կապիտալը ՀՀ քաղաքացին է, և թե՛ իմ, թե՛ իմ գործընկերների ամբողջ ներուժը միտված է ՀՀ քաղաքացու համար այնպիսի պայմաններ ստեղծելուն, որ նա ստիպված չլինի լքել իր հայրենիքը: Ավելորդ չեմ համարում նշելու, որ մեր կուսակցության ֆինանսական ռեսուրսները գոյանում են մեր անձնական խնայողությունների և մեր համակիրների միջոցներից:

Հակոբ - Խորհրդարան անցնելու դեպքում որքանո՞վ է հավանական, որ «Ազատ դեմոկրատներ»-ը չեն առանձնանա «Ժառանգությունից» եւ պաշտոն ստանալու համար իշխանություններին չեն միանա (իհարկե, եթե մեծամասնություն չլինեք):

Հարգելի' Հակոբ, շնորհակալ եմ հարցի համար: Նախ ասեմ, որ մենք գտնում ենք, որ այսօր Հայաստանում տիրող տագնապային և ծանր իրավիճակի ամբողջական պատասխանատուն կոալիցիոն ուժերն են, առանց որևէ բացառության կամ ըստ մեղքի աստիճանի դասակարգման: Դա հասկանալի է հասարակության ամենատարաբեր շերտերին:

Երկրորդ՝ Հայաստանի ապագան մենք երբևիցե չենք կապել և չենք կապում գործող կոալիցիայի հետ և միշտ պայքարել ենք այդ քաղաքական ուժերի դեմ՝ ունենալով բացարձակ տարբեր պատկերացումներ Հայաստանի զարգացման, ժողովրդավարացման և այլ խնդիրների վերաբերյալ: Ես ուղղակիորեն բացառում եմ իշխանությունների հետ կոալիցիա կազմելու որևիցե տարբերակ: Կարծում եմ՝ նման մոտեցումները շրջանառության մեջ դնելը դիտավորություն է այն քաղաքական ուժերի և գործիչների կողմից, որոնք հենց իրենք պաշտոնապես կամ կուլիսներում ուղղակիորեն համագործակցում են իշխանությունների հետ` անձնական կամ նեղ խմբային շահերից ելնելով, որից տուժում է միայն հասարակությունը:

Երրորդ՝ մեր և «Ժառանգություն» կուսակցության՝ միասնական թիմով հանդես գալու հանգամանքը խարսխված է թե՛ գաղափարական, թե՛ Հայաստանի զարգացման հետ կապված մեր ընդհանուր պատկերացումների վրա, և միասնական թիմով գործելու հանգամանքը մեզ ավելի մեծ հնարավորություն կտա և արդեն տալիս է՝ ավելի հեշտ հասնելու այն խնդիրների ու մարտահրավերների լուծմանը, որոնք մենք համարում ենք օրհասական թե՛ Հայաստանի Հանրապետության, թե՛ ՀՀ քաղաքացիների համար:

Չորրորդ՝ կտրականապես բացառում եմ «Ազատ դեմոկրատների» և «Ժառանգության»  առանձին-առանձին հանդես գալը ԱԺ-ում և պնդում եմ, որ մեր միասնությունից շահելու է ՀՀ քաղաքացին, և մեր միասնության արդյունքում են տեղի ունենալու այն բարեփոխումները, որոնց կարիքն այսօր ունի մեր պետությունը:

Մենք գալիս ենք արդարացնելու մեզ վստահած յուրաքանչյուր քաղաքացու սպասումները, գալիս ենք ապահովելու մեր քաղաքացիների անվտանգ, բարեկեցիկ և արժանապատիվ կյանքով ապրելու իրավունքը:  Մենք արդարացնելու ենք մեզ վստահած յուրաքանչյուր անձի հույսերն ու նպատակները: Թող ոչ ոք չկասկածի:

Սիրեկ - Պարոն Քոքոբելյան, «Ժառանգության» քարոզարշավի մեկնարկի ժամանակ Մարիոթ հյուրանոցում դուք Րաֆֆիի Հովհաննիսյանին բեմ հրավիրելու ? (ընթերցողի հարցը լիարժեք չէ-խմբ.) Հովհաննիսյանին, ո՞րն է Րաֆֆի Հովհաննիսյանի հաջողությունների գրավականը, եւ արդյո՞ք 2013-ին Հովհաննիսյանի շանսերն այդքան մեծ են:

Հարգելի Սիրեկ, շնորհակալ եմ հարցի համար: Նշեմ, որ թե՛ Րաֆֆի Հովհաննիսյանը և թե՛ նրա գլխավորած միասնական ցուցակը ռեալ այլընտրանք է այսօրվա քաղաքական դաշտում, այլընտրանք ՀՀ երեք նախագահներին ու նրանց արբանյակներ համարվող քաղաքական ուժերին: Այն ծրագրերը և մոտեցումները, որոնք առաջ են քաշվում մեր միասնական թիմի կողմից, միակ ռեալ այլընտրանքն են այսօրվա իրավիճակին: Ես վստահ եմ, որ դա ճիշտ կգնահատվի հասարակության ճնշող մեծամասնության կողմից և, անշուշտ, կտա իր պտուղները:

ՏՈՒՖ-ի նախկին բանվոր - Պարոն Քոքոբելյան, ի՞նչ եղավ «Արթիկտուֆ»-ի մեքենատրակտորային հզոր պարկը: Ինչու՞ չեն վճարվում «Արթիկտուֆ» ԲԲԸ-ի Ձեր, նշված ընկերությունում տնօրենների խորհրդի նախագահ եղած ժամանակներից գոյացած բանվորների աշխատավարձերը: Պատասխանեք խնդրում ենք, որպեսզի կարողանանք ճիշտ ընտրություն կատարել: Շնորհակալություն:

Հարգելի քաղաքացի, շնորհակալ եմ հարցի համար: Նախ՝ հարկ եմ համարում տեղեկացնել, որ արդեն շուրջ մեկ տարի է՝ ես այլևս որևէ առնչություն չունեմ «Արթիկտուֆ» ՓԲԸ-ի հետ: Երկրորդ՝ ցանկանում եմ ուղղակի նշել, որ «Արթիկտուֆ» ՓԲԸ-ն մենք ձեռք ենք բերել 183 մլն ՀՀ դրամ պետական պարտքով, իսկ ձեռքբերման պահի դրությամբ «Արթիկտուֆ» ՓԲԸ-ում չէր աշխատում նույնիսկ մեկ մեքենա կամ հաստոց: Մեզ հաջողվել է մարել այդ բոլոր պարտքերը, բառացիորեն չաշխատող հիմնարկությունը բերել խիստ աշխատանքային վիճակի, և իմ տեղեկություններով՝ չկա որևիցե պարտք թե՛ պետությանը, թե՛ աշխատակիցներին: Անգամ ֆինանսատնտեսական ճգնաժամի պայմաններում հիմնարկը պահպանել է իր կենսունակությունը:

Արթիկցիներ - Պարոն Քոքոբելյան, ծրագրեր ունե՞ք վերականգնելու «Արթիկտուֆ»-ի երբեմնի հզորությունը, որով ահագին կնվազի մեր քաղաքից մարդկանց արտագաղթը:

Սիրելի արթիկցիներ, շնորհակալ եմ հարցի և պետությունը չլքելու ձեր մարտական տրամադրվածության համար: Ցավոք սրտի, այս պահին անհնար եմ համարում վերականգնել «Արթիկտուֆի» երբեմնի հզորությունը, մինչև Հայաստանում չիրականացվեն այն քաղաքատնտեսական բարեփոխումները, որոնք բերելու են մրցակցային ազատ պայմանների: Իսկ այդ փոփոխությունները, հուսով եմ, ընտրվելու դեպքում մեծապես մեր ջանքերով կիրականացնենք, և անկախ նրանից, որ ես այդ հիմնարկի հետ այլևս կապ չունեմ, բարենպաստ գործարար միջավայրի պայմաններում, վստահ եմ, որ ցանկացած այլ սեփականատեր կարող է այդ դաշտում լիարժեք գործունեություն ծավալել և արդյունավետ աշխատել թե իր, թե արթիկցիների համար:

Նար - Պարոն Քոքոբելյան, ո՞րն է Ձեր քաղաքական կառավարման մակարդակի բարձր լինելու հիմնասյունը, ինչի մասին այդքան շատ խոսվում ու գրվում է տարբեր լրատվամիջոցներով:

Հարգելի Նար, շնորհակալ եմ հարցի համար: Նշեմ, որ մենք վարում ենք իրատեսական քաղաքականություն՝ զերծ մնալով իմիտացիոն քաղաքական գործընթացներից, հիմքում ունենալով նպատակների և խնդիրների հստակ ձևակերպում և դրանց հետևողականորեն հետամուտ լինելու վճռականություն, մեր ներուժի ճիշտ տեղաբաշխում ու օգտագործում:

Գագիկ - Պարոն Քոքոբելյան, Ձեզ հաջողություն մաղթելով՝ ցանկանում ենք իմանալ, թե «Արթիկտուֆը» կաշխատի՞, և արթիկցին կրկին աշխատանք կունենա՞: Շնորհակալություն:

Հարգելի Գագիկ, շնորհակալ եմ մաղթանքի և հարցի համար: Արթիկցիների նմանատիպ հարցին արդեն վերը պատասխանել եմ: «Ժառանգություն» կուսակցության հետ մեր միասնական նախընտրական ծրագրում առանցքային տեղ է հատկացված հենց աշխատատեղերի ստեղծմանը և դրան նպաստող պայմանների ու միջավայրի ձևավորմանը: Այս պահի դրությամբ կարող եմ վստահեցնել, որ ԱԺ-ում մենք ձեռնամուխ ենք լինելու մեր ծրագրի դրույթների և առաջին հերթին այդ կարևորագույն խնդրի լուծմանը: Այդ դեպքում, կարծում եմ, թե' արթիկցին և թե' Հայաստանի Հանրապետության այլ գործազուրկ քաղաքացիներ ստիպված չեն լինի աշխատանք փնտրել մեր երկրի սահմաններից դուրս:

WWW - Դավաճան ծնվու՞մ են, թե՞ դառնում //

Հարգելի WWW, կարծում եմ, որ այդ հարցով պետք է դիմել հոգեվերլուծաբանի:

Պարոն Քոքոբելյան, Դուք դաշինք եք կազմել մի ուժի հետ, որը Թուրքիայի հետ հարաբերությունների հաստատումը պայմանավորում է Ցեղասպանության ճանաչման հետ և դնում է Հայաստանի կողմից ԼՂՀ-ի անկախությունը ճանաչելու մասին հստակ պահանջ: Կիսու՞մ եք, արդյոք, այդ դիրքրոշումները, և ինչպիսի՞ն է լինելու Ձեր մոտեցումը, եթե անցնեք խորհրդարան և կրկին օրակարգ բերվեն այս հարցերը:

Հարգելի Տիգրան, շնորհակալ եմ հարցի և մեր ուժի նկատմամբ ցուցաբերած հետևողական ուշադրության համար: Թե՛ «Ազատ դեմոկրատները», թե՛ «Ժառանգությունը» գտնում են, որ Թուրքիայի հետ դիվանագիտական հարաբերությունները պետք է հաստատվեն առանց նախապայմանների, և այդ հարցում մենք որևէ տարաձայնություն չունենք: Ինչ վերաբերում է Հայաստանի կողմից ԼՂ ճանաչման խնդրին, ապա թե՛ մենք, թե՛ «Ժառանգությունը», թերևս նաև ցանկացած գիտակից քաղաքական ուժ Հայաստանում, գտնում ենք, որ Լեռնային Ղարաբաղը դե ֆակտո իր բոլոր ատրիբուտներով անկախ պետություն է և այժմ քաղաքական ուժերի ու բուն Հայաստանի Հանրապետության գերխնդիրն է հասնել ԼՂ-ի ինքնորոշման միջազգային ճանաչման, իսկ Հայաստանի կողմից ԼՂ անկախությունը ճանաչելու խնդիրը համարում ենք ոչ թե ռազմավարական, այլ մարտավարական հարց, և վստահ եղեք, որ օրհասական պահին մենք կկարողանանք այդ մարտավարական հարցում ունենալ ընդհանուր դիրքորոշում, որը այս պահին որևիցե խոչընդոտ չի հանդիսանում և չի հանդիսանա մեր միջև: 

Տիգրան - Եվս մեկ հարց. կարո՞ղ եք բացատրել Ձեր կուսակցության անվանման իմաստը: Մի՞թե կարելի է պատկերացնել ոչ ազատ դեմոկրատներ, դեմոկրատիա առանց ազատության կամ ազատություն առանց դեմոկրատիայի: 

Եվս մեկ անգամ շնորհակալություն հարցի համար: Պատասխանի ծավալները չգերազանցելու և նյութն ընթերցանության համար ձանձրալի չդարձնելու համար ես հակիրճ պատասխան կտամ, իսկ անհրաժեշտության դեպքում կարող եմ Ձեզ փոխանցել ավելի ծավալուն նյութ այդ հարցի հետ կապված:

Այսպես, մեր առաքելությունը Հայաստանում ազատական դեմոկրատիա կառուցելն է: Սա նշանակում է ազատականություն և դեմոկրատիա: Սա նշանակում է, որ ազատականության այնպիսի հիմնարար արժեքները, ինչպիսիք են` անկախ դատարաններ, օրենքի գերակայություն և մասնավոր սեփականության պաշտպանվածություն, պետք է ընկած լինեն դեմոկրատիայի հիմքում: Եթե դա այդպես չէ, ապա դեմոկրատիան բերում է ոչ թե ազատության, բարեկեցության և զարգացման, այլ տանում է հակառակ ուղղությամբ: Հաճախ ստացվում է, որ պետություններում դեմոկրատիան դրսից ներմուծվում է, իսկ ազատականությունը` ոչ:

Հաճախ բոլորովին ազատ և արդար ընտրությունների արդյունքում իշխանության են գալիս ֆաշիստները, ժուլիկները: Ինչու է այդպես կատարվում, այն պարզ պատճառով, որ մարդիկ մտածում են հակառակ տրամաբանությամբ: Կարևոր են համարվում դեմոկրատական կարգի հաստատումը և մտածում են, որ արդեն դեմոկրատիայից ինքնին կապահովվեն արդար և անկախ դատարաններ, սեփականության անձեռնմխելիություն, իշխանությունից անկախ բիզնես, տնտեսական զարգացում: Սակայն ամեն ինչ, ցավոք, հակառակն է լինում: Ազատական դեմոկրատիա տանդեմում ազատականությունը ոչ թե բխում է դեմոկրատիայից, այլև նախորդում է դեմոկրատիային, ընդ որում` բավականին երկար ժամանակ, և առաջին հերթին ազատականության հիմնարար սկզբունքները` սեփականության անձեռնմխելիությունը և օրենքի գերակայությունը, որն ապահովում է անկախ դատարան: Մնացած ամեն ինչ (մամուլի ազատություն, հավաքների, միավորումների, ընտրությունների և այլն) կարելի է հետագայում ունենալ:

Բայց նախևառաջ պետության և հասարակության մեջ պետք է արմատավորվեն ազատական գաղափարները, ձևավորվի համապատասխան մշակույթ: Ահա սրա մեջ էլ թաքնված է այն գաղտնիքը, թե ինչու համեմատաբար հեշտ իր ուսերին ընդունելով դեմոկրատիան՝ հասարակությունները հեռացնում են ազատականությունը և որպես հետևանք կորցնում են դեմոկրատիան:

Գարիկ - Պրն Քոքոբելյան, Դուք ասել եք, որ թիվ 10 ընտրատարածքում պաշտպանելու եք Գարեգին Նուշիկյանի թեկնածությունը, մինչդեռ տրամաբանական կլիներ, եթե Դուք պաշտպանեիք Սուքիասյանի թեկնածությունը`որպես ընդդիմադիր: Այս պարագայում հնարավո՞ր է՝ վաղը Դուք պաշտպանեք իշխանական նախագահի թեկնածուին՝ նույն բացատրություններով: Եվ վերջապես, ինչպես հավատանք Ձեզ որպես ընդդիմադիր:

Հարգելի Գարիկ, շնորհակալ եմ հարցի համար: Գարեգին Նուշիկյանը անկուսակցական է, և նրան կարող են պաշտպանել նաև ընդդիմադիր քաղաքական գործիչները: Ես ասել եմ, որ ես՝ որպես թիվ 10 ընտրատարածքի ընտրող, քվեարկելու եմ Գարեգին Նուշիկյանի օգտին: Առանց ցանկություն ունենալու նսեմացնել Նուշիկյանի մյուս մրցակիցներին, ես՝ լինելով ազատական մարդ, իրավացիորեն կարծում եմ, որ Գարեգին Նուշիկյանի ԱԺ պատգամավոր դառնալու հանգամանքից կշահի թե՛ ԱԺ-ն, թե՛ օրենսդրական դաշտը, թե՛ ընտրողը: Եւ այդ հարցն անընդհատ շահարկել և փորձել դիտարկել ընդդիմության և իշխանության դաշտում, շատ պարզունակ եմ համարում: Դժբախտաբար, Հայաստանը փոքր երկիր է, և բոլորս բոլորին ճանաչում ենք, հետևաբար չի կարելի անտեսել անձի մարդկային որակները:

Վարդան - Պարոն Քոքոբելյան, Ձեր ղեկավարած կուսակցության և «Ժառանգության» ընդհանուր ցուցակում տեղ է զբաղեցրել ԱԺ պատգամավոր Վարդան Խաչատրյանը, որի մասին մարտի 1-ի հայտնի հեռախոսային ձայնագրության մեջ` ի պատասխան ոմն Սուրիկի պնդման, որ Վարդան Խաչատրյանը բանակցում է ոստիկանների հետ, թե գնանք վաղը հավաքվենք... Ալիկ Արզումանյանը ասում է. «Վարդան Խաչատրյանն ինչ ... (հայհոյանք) ա... Հիմա ինչպե՞ս եք պատկերացնում ...ի (հայհոյանք) և Ալիկ Արզումանյանի համատեղ պայքարը, աշխատանքը ԱԺ- ում: Շնորհակալություն: 

Հարգելի Վարդան, շնորհակալ եմ հարցի համար: Միանգամից նշեմ, որ դա ապատեղեկատվություն է. Վարդան Խաչատրյանը ոստիկանների հետ չի բանակցել, ու այդ մասին այս ընթացքում բազմիցս է խոսվել: Թե Ալեքսանդր Արզումանյանը, թե Վարդան Խաչատրյանը այն քաղաքական գործիչներն են, որոնք իրենց քաղաքական գործունեության ընթացքում միշտ պայքարել են այն քաղաքական արժեհամակարգի համար, որին մենք հետամուտ ենք մեր միասնական թիմով և որևիցե խնդիր նրանց՝ ԱԺ-ում միասին աշխատելու առումով չեմ տեսնում: