HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ընտրություններին մասնակցող թեկնածուների 36․3%-ը կանայք են․ ցուցակների վերլուծություն

«Հետքը» շարունակում է վերլուծել արտահերթ խորհրդարանական ընտրություններին մասնակցող կուսակցությունների և դաշինքների՝ Կենտրոնական ընտրական հանձնաժողով ներկայացրած ցուցակները։

Այսպես, ԿԸՀ-ն գրանցել է 26 քաղաքական ուժ՝ 22 կուսակցություն և 4 դաշինք։ Այս կուսակցություններն ու դաշինքները, ընդհանուր առմամբ, ներկայացրել են 2605 թեկնածու։  

Ինչպես երևում է ինֆոգրաֆիկայում՝ ամենաշատ թեկնածուներն ունի ՀՀԿ-«Հայրենիք» կուսակցության «Պատիվ ունեմ» դաշինքը՝ 230 թեկնածու։ Ամենից քիչ թեկնածուներ ներկայացրել է Սամվել Բաբայանի «Ազատական» կուսակցությունը՝ 80։

Թեկնածուների ընդհանուր թվի 36․3%-ը կանայք են։

26 քաղաքական ուժերից ընդամենը 2-ն են գլխավորում կանայք՝ «Միասնական հայրենիք» կուսակցության առաջին համարը Լուսինե Ավագյանն է, իսկ «5165 ազգային պահպանողական շարժում» կուսակցության ընտրացուցակը գլխավորում է անկուսակցական Կարինե Տոնոյանը ։

Ներկայացնում ենք նաև կուսակցությունների և դաշինքների կին և տղամարդ թեկնածուների թվային և տոկոսային հարաբերակցությունը։

 

Կանանց համամասնությունն ամենացածրն է «Հայաստան» դաշինքում (30․7%), իսկ ամենաբարձրը Համահայկական Ազգային Պետականություն (ՀԱՊ) կուսակցությունում (43.9%):

Համապետական ցուցակներն ունեն երկու մաս։ Առաջին մասը սովորական ցուցակներն են, որոնցում կուսակցություններն ու դաշինքները ներկայացնում են իրենց թեկնածուներին, իսկ երկրորդ մասը նախատեսված է ազգային փոքրամասնությունների ներկայացուցիչ թեկնածուների համար։ Վերևում ներկայացված թվերը վերաբերվում են ցուցակի առաջին մասին։

Այս ընտրություններին իրենց ցուցակներում ազգային փոքրամասնությունների ներկայացուցիչներ են ընդգրկել 4 կուսակցություն և 1 դաշինք։

Կուսակցությունների և դաշինքների ցուցակներում ընդգրկված որոշ թեկնածուների գրանցումը ԿԸՀ-ն մերժել է տարբեր պատճառներով։ Այսպես, ընդհանուր առմամբ ԿԸՀ-ն մերժել է 25 թեկնածուի գրանցում։

Մեկական թեկնածու՝ «Արդար Հայաստան», «Բարգավաճ Հայաստան», «Հայաստանի դեմոկրատական», «Հայաստանի եվրոպական» կուսակցություններից և «Շիրինյան-Բաբաջանյան ժողովրդավարների» դաշինքից։ Երկուական  թեկնածուի գրանցում մերժվել է «Միասնական հայրենիք» կուսակցությունից և «Ազատ հայրենիք» դաշինքից։ Երեք թեկնածուի գրանցում մերժվել է «Ազատություն» կուսակցությունից, չորս թեկնածու՝ «Ազգային-ժողովրդավարական բևեռ» կուսակցությունից և ինը թեկնածու՝ «Զարթոնք» ազգային քրիստոնեական կուսակցությունից։

 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter