Լոռու մարզի Օձուն համայնքում նախընտրական քարոզարշավի ժամանակ վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանն անդրադարձավ այն քննադատություններին, որ քարոզարշավի շրջանակում պարբերաբար անդրադառնում է նախկին իշխանություններին: Ըստ Փաշինյանի` նախկին իշխանություններն են ամենատարբեր առիթներով իր մասին արտահայտվում, ինքն էլ պատասխանում է: Փաշինյանը հարց հնչեցրեց, թե ի՞նչ կանեին Հայաստանի նախկին երեք նախագահները` Լևոն Տեր-Պետրոսյանը, Ռոբերտ Քոչարյանը և Սերժ Սարգսյանը, ինչպե՞ս կվարվեին ԼՂ-ի բանակցությունների հարցում, եթե իր փոխարեն լինեին:

«Սերժ Սարգսյանի ձեռամբ արդեն բացվել են 2018-ի բանակցային իրադարձությունները, արդեն բոլորդ գիտեք, որ Հայաստանին առաջադրվել էր տարածքներ ոչ մի բանի դիմաց բանաձևը, թող կանգնեն ու ասեն, թե այդ պահից ինչ գործողություններ էին անելու, ինչ տրամաբանությամբ էին առաջնորդվելու: Երբ սրանից առաջ ասում էինք` դուք ինչ էիք անելու, ասում էին` դե տեղյակ չենք, հիմա բոլորդ ինֆորմացված եք, թող ասեն բոլորը ոնց էին պատկերացնում այդ կետից գործողությունների հետագա պլանը»,- ասաց Փաշինյանը: Ըստ նրա` լուծումը պետք է լիներ մեկը, որ 2018-ի դրությամբ բոլոր առումներով, երկրի մարտունակության բարձր մակարդակ ապահովվեր և զուգորդվեր բանակցային գործընթացը:

Վարչապետի պաշտոնակատարն անդրադարձավ նախկին իշխանությունների ներկայացուցիչների այն պնդմանը, թե նախկինում բանակում սննդի խնդիր չի եղել, նա պատմեց, որ վարչապետ ընտրվելուց հետո մեկնել էր առաջնագիծ, այնտեղ փորձարկել սնունդը և մեկ ժամ անց իր զգացողությունը վատացել էր: Փաշինյանն ընդգծեց` դա ուտելիքի հարց չէ, այլ զինվորի մարտունակության բարձրացման, զինվորը ամենաբարձր զգոնությամբ պետք է իր ծառայությունն իրականացնի, սակայն նման սննդով դա հնարավոր չէր:

Փաշինյանը հեգնեց` երբ նախկին իշխանություններն ասում են սննդի խնդիր չի եղել բանակում, հավանաբար նկատի ունեն այն, որ զինվորների ընտանիքներն այն ամեն ինչ հարկավոր է եղել, ուղարկել են:

Նիկոլ Փաշինյանը վստահեցրեց` 44-օրյա պատերազմի հանգամանքների քննությունը խորհրդարանական ընտրություններից հետո առանցքային նպատակ պետք է դառնա:

Լուսանկարը` ՔՊ ֆեյսբուքյան էջից: