Գավառում քարոզարշավի ժամանակ վարչապետի պաշտոնակատար Նիկոլ Փաշինյանը անդրադարձավ 15 գերու Հայաստան վերադարձի մանրամասներին: Նա հայտնեց` գերիները րոպեներ առաջ հատել են են Հայաստանի սահմանը և գտնվում են Հայաստանում:

«Երկու օր առաջ հանդիպում եմ ունեցել ԱՄՆ պետքարտուղարի տեղակալի հետ, ով ասաց որ ԱՄՆ պետքարտուղարի հանձնարարությամբ ունի առաքելություն` այս օրերի ընթացքում ինչ-որ մի ճեղքում ապահովել գերիների վերադարձի հարցում, և եթե պատրաստ ենք նման համագործակցության, իրենք պատրաստ են ներգրավվել գործին: Ես, բնականաբար, ասացի, որ պատրաստ ենք, և ահա այսօր գործադրված ջանքերի արդյունքում, այդ թվում` Վրաստանի վարչապետի, նաև ուզում եմ հիշատակել ԵՄ մեր գործընկերներին, որ նախորդ օրերին ջանքեր են գործադրել, մեր 15 գերեվարված եղբայրները վերադառնում են Հայաստան»,- ասաց Փաշինյանը:

Նրա խոսքով` գերիները Ադրբեջանի Կարմիր կամրջով տեղափոխվել են Վրաստան, հետո Բագրատաշենով` Հայաստան, այժմ կտեղափոխվեն բուժզննության: Փաշինյանը հորդորեց հարազատներին ավելորդ աժիոտաժ չստեղծել, մի քանի ժամ էլ համբերել տեսակցելու համար:

«Մամուլում կար տեղեկատվություն, որ մենք ականապատ դաշտերի քարտեզ ենք փոխանցել Ադրբեջանին, դա ճիշտ է, համապատասխանում է իրականությանը, բայց ոչ թե քարտեզները փոխանակել ենք գերիների հետ, այլ քայլին քայլով ենք պատասխանել»,- ասաց նա:

Նիկոլ Փաշինյանը ուշադրություն հրավիրեց այն հանգամանքի վրա, որ վերջին շրջանում ԵԱՀԿ Մինսկի խմբի համանախագահությունը իր հայտարարություններով անընդհատ շեշտում էր հումանիտար ականազերծման անհրաժեշտության մասին: Փաշինյանն ընդգծեց` խոսքն այն ականների մասին է, որոնք գտնվում են Ադրբեջանի զինված ուժերի թիկունքում:

Վարչապետի պաշտոնակատարի խոսքով` նոյեմբերի 9-ի հայտարարության ստորագրումից հետո գերիների փոխանակման գործընթացին զուգընթաց պարբերաբար որոշակի թվով քարտեզներ փոխանակել են Ադրբեջանի հետ, որպեսզի կառուցողական մթնոլորտ լինի գերիների, զոհերի մարմինների փոխանակման հարցում, սակայն ժամանակի ընթացքում Ադրբեջանը դադարեցրել է գերիների վերադարձը և դիմել միջազգային կազմակերպություններին` պնդելով, թե Հայաստանը հրաժարվում է քարտեզներ տրամադրելուց: Փաշինյանը մանրամասնեց` նույնիսկ ՌԴ ԱԳ նախարար Սերգեյ Լավրովի` Երևանում գտնվելու ժամանակ որոշ քարտեզներ ուղարկել է Բաքու:

«Մենք չենք ընկալում, որ քարտեզները փոխանակում ենք գերիների հետ, ընկալում ենք, որ քայլին պատասխանում ենք քայլով, պատրաստ ենք այս գործընթացը շարունակել և խնդիր ենք դրել առաջնահերթ, որ լիարժեք ավարտին հասցնենք գերիների վերադարձի գործընթացը»,- ասաց նա՝ շնորհակալություն հայտնելով բոլոր միջազգային գործընկերներին այս հարցում աջակցելու համար:

Փաշինյանը ընթերցեց գերիների անունները` Արթուր Ստեփանյան` Արմավիրից, Գեղամ Էլիբեկյան` Արտաշատից, Ալեքսան Սեդրակյան` Արմավիրից, Էրիկ Գասպարյան` Երևանից, Սաշա Բաբայան` Մասիսից, Արտակ Անդրեասյան` էջմիածնից, Էրիկ Խաչատրյան` Մասիսից, Նարեկ Սիրունյան՝ Հրազդան, գյուղ Քաղսիից, Սասուն Պետրոսյան` Արցախից, Վրույր Սարգսյան՝ Կոտայքից, Արմեն Բուդոյան` Գեղարքունիքից, Բորիս Օհանյան` Ալավերդիից, Արթուր Աբգարյան` Արմավիրից, Դավիթ Ոսկանյան` Արմավիրից, Արգամ Հունանյան` Արմավիրից:

Փաշինյանի խոսքով` այս խմբի մեջ են Վարդենիսից վերջերս վեց գերեվարվածներից չորսը, նաև` Խծաբերդ-Հին Թաղեր հատվածում գերեվարվածներից մի քանիսը, նաև պատերազմի ընթացքում` հոկտեմբերին գերեվարված մի քանի հոգի:

Փաշինյանը վստահեցրեց` նախընտրելի անուններ չունի գերիների փոխանակման հարցում, քանի որ ՀՀ քաղաքացիների միջև չի կարող տարբերակում դնել:

«Ես չեմ կարող որևէ անուն տալ, որովհետև եթե մյուսների ընտանիքների հետ հանդիպեմ, չեմ կարող նրանց աչքերի մեջ նայել: Ես ասել եմ, որ մեզ համար միանշանակ է, որ մեր բոլոր եղբայրները պետք է վերադառանան, նրանցից ոչ մեկի մեջ տարբերություն չեմ դնում»,- ասաց նա: