Վարչապետի պաշտոնակատար, «Քաղաքացիական պայմանագիր» կուսակցության վարչապետի թեկնածու Նիկոլ Փաշինյանն այսօր Հանրային հեռուստաընկերության ուղիղ եթերում մասնակցելու է վարչապետի թեկնածուների միջև ընթացող բանավեճին:

Այս մասին ասաց Փաշինյանը Հանրապետության հրապարակում հրավիրված ամփոփիչ հանրահավաքին: Նա իր հրավերն ուղղեց քաղաքական հակառակորդներին, որոնք այս ընթացքում բազմաթիվ մեղադրանքներ են հնչեցրել իր հասցեին:

«Եկեք և ուղիղ եթերում կանգնեք ժողովրդի առաջ և ի ցույց դրեք, թե ով ով է, որտեղից է գալիս ու ուր է գնում»,- ասաց նա:

Փաշինյանը քարոզարշավի նախորդող 10 օրերը բավական տպավորիչ գնահատեց հիշեցնելով, որ այցելել են բոլոր մարզեր, ունեցել բազմաթիվ նախատեսված ու չնախատեսված հանդիպումներ:

«Հայաստանի ժողովուրդը մեզ դուխ տվեց և ուժ տվեց, վստահություն տվեց և սեր, իշխանություն տվեց շարունակելու ՀՀ առաջնորդությունը, և հիմա մնացել է դե ֆակտո այս իրողությունն արձանագրել նաև դե յուրե»,- ասաց նա:

Նիկոլ Փաշինյանի խոսքով` ապագայի մասին իրենց պատկերացումները հիմնված են չորս հենասյուների վրա` անվտանգություն, տնտեսություն, իրավունք ու արդարություն և մարդկային կապիտալի զարգացում:

«Այս չորս հենասյուների ներքին կապերը բազմաթիվ են, և ուրեմն, այս ոլորտներում մեր զարգացման տեսլականները փոխլրացնող են և փոխկապակցված, այս է պատճառը, որ ուղղություններից որևէ մեկը չենք դիտարկում մյուսից մեկուսացած, ինչպես չի կարող մարդկային որևէ օրգան մեկուսացած լինել մյուսներից: Տնտեսության մասին մեր ռազմավարական պատկերացումը հետևյալն է, այն պետք է լինի գիտելիքահեն` սկսած գյուղատնտեսությունից շարունակած արտահանմամբ ու առևտրով»,- ասաց ՔՊ վարչապետի թեկնածուն:

Փաշինյանը կարևորեց Հայաստանի երկաթուղային հաղորդակցության ապահովման հարցը հարևան երկրների` ՌԴ-ի և ԻԻՀ-ի:

«Ընդ որում կրկին ու կրկին ուզում եմ ընդգծել` մեր կառավարությունը չի քննարկել, չի քննարկում ու չի քննարկելու միջանցքային որևէ տրամաբանություն, այսինքն կոմունիկացիաների բացման համատեքստում Հայաստանի որևէ սուվերեն տարածքի կարգավիճակի փոփոխությունը բացառում ենք: Թուրքիայի ու Ադրբեջանի կողմից հնչող հայտարարությունները` Հայաստանի տարածքով միջանցք ստանալու մասին, այլ բան քան աբսուրդ, դժվար է անվանել»,- ասաց Փաշինյանը:

Վարչապետի պաշտոնակատարը պնդեց` Հայաստանի դիրքորոշումը հստակ է `տարածաշրջանի տնտեսական կոմունիկացիաները պետք է ապաշրջափակվեն, և այդ իմաստով հաղորդակցության ուղիներ երկրները կստանան համաչափ, այնպես, ինչպես ամրագրված է 2021-ի հունվարի 11-ին Մոսկվայում ընդունված հայտարարության տեքստում:

Փաշինյանի համոզմամբ` այդ հեռանկարին խանգարում են Ադրբեջանի ագրեսիվ, ապակառուցողական հայտարարությունները, նաև միջազգայնորեն ստանձնած պարտավորությունների չկատարումը:

«Տարածաշրջանային անվտանգության առումով ուզում եմ հատուկ ընդգծել ԻԻՀ-ի հետ մեր համագործակցության խորացման անհրաժեշտությունը և ռազմավարական երկխոսության մեկնարկը: ԵԱՀԿ Մինսկի խմբի համանախագահների ամբողջական վերաներգրավումը տարածաշրջանային անվտանգության կարևոր երաշխիք եմ համարում, և վերջերս այս թեզի գործնական արդյունավետության շատ լավ օրինակ տեսանք»,- ասաց նա:

Փաշինյանը սակայն ընդգծեց` անվտանգության ապահովման առանցքային գործոնը Հայաստանի զինված ուժերի բարեփոխումների բարեհաջող ընթացքն է:

«Բազմիցս ընդգծել եմ, որ անցումը պրոֆեսիոնալ բանակին այլընտրանք չունի»,- ասաց նա: