Հուլիսի 1-ից Եվրասիական միության բոլոր երկրներում արդեն ավարտվել է դեղերի միասնական գրանցմանն անցնելու առաջին փուլը։ Այսպիսով, նոր դեղորայքի գրանցման ժամանակ հայտերը ԵԱՏՄ լիազորված մարմինները պետք է ընդունել միայն Միության կանոններին համապատասխան:

Միևնույն ժամանակ, ազգային ռեեստրներում արդեն իսկ գրանցված դեղերն այդ գրանցումներով կարող են շրջանառության մեջ լինել մինչև 2025 թվականի վերջը։

Դեղարտադրողները իրավունք ունեն պահպանելու իրենց գրանցման դոսյեները մինչև 2025 թվականի ավարտը, իսկ եթե հնգամյա ժամկետի ավարտից հետո ցանկություն կունենան դարձյալ ԵԱՏՄ տարածքում վաճառելու նույն դեղամիջոցները, ապա արդեն գրանցման դոսյեները պետք է համապատասխանեցվեն Միության օրենսդրությանը։

Վերջին 6 տարիներին՝ 2016-ից մինչև 2021թ. մայիս ընկած ժամանակահատվածում, Հայաստանն արտահանել է 14,5 հազար տոննա դեղամիջոց՝ մոտ 53 մլն ԱՄՆ դոլարի։ Հայկական դեղերի արտահանման մեծ ծավալներն ապահովում են տեղական 4 խոշոր արտադրող՝ «Լիկվոր»-ը, «Արփիմեդ»-ը, «Մեդիկալ Հորիզոն»-ն ու «Էսկո Ֆարմ»-ը։

Հայկական դեղերի 80%-ն արտահանվում է Վրաստան, մնացածը՝ Ռուսաստան, Ուզբեկստան, Եմեն, Տաջիկստան և այլ երկներ։

Դեղերի մեծ մասը Հայաստան են ներկրվում Ռուսաստանից՝ մոտ 40%-ը, ապա ՝ Գերմանիայից, Ֆրանսիայից, Բելառուսից, Սլովենիայից և Իտալիայից։

Վերջին տարիներին Հայաստանը արտահանել է մոտ 3 հազար տոննա ավելի շատ դեղորայք, քան ներկրել է։ Օրինակ՝ 2016-ից մինչև 2021թ. մայիս ընկած ժամանակահատվածում Հայաստան է ներկրվել 11,4 հազար տոննա դեղորայք, ընդհանուր՝ մոտ 700 մլն ԱՄՆ դոլար արժողությամբ։

Նշենք, որ երեկ՝ հուլիսի 6-ին, Եվրասիական տնտեսական հանձնաժողովն արդեն անցկացրել է սեմինար`դեղերի և բժշկական սարքերի գրանցման դոսյեների փորձաքննության մոտեցումների ներդաշնակեցման վերաբերյալ, որին մասնակցել են գրանցում իրականացնող ավելի քան 50 կազմակերպությունների ներկայացուցիչներ՝ Հայաստանից, Բելառուսից, Ղազախստանից, Ղրղզստանից և Ռուսաստանից։

Բացի այդ, դիտարկվել են բժշկական օգտագործման ցուցումների (ներդիր-թերթիկների)` օգտագործողի կողմից փորձարկումներ կատարելու, ինչպես նաև բժշկական օգտագործման համար նախատեսված դեղերի գրանցման և փորձաքննության ընթացակարգերի իրականացման վարչական կողմերը:

Քննարկվել են նաև գիտական ​​կամ նախագրանցման ժամանակ խորհրդատվության, փորձաքննության ընթացքում ծագող հակասական հարցերի շուրջ կողմերի միասնական մոտեցումները, դեղերի տարբեր խմբերի համար բժշկական օգտագործման ցուցումների (թռուցիկների) կազմումը, գրանցման դոսյեի քննության գործընթացում դրանց գնահատման արդյունքների տրամադրումը:

Գլխավոր լուսանկարը՝  РИА Новости / Ալեքսեյ Մայշեւ