Բաքվում հուլիսի 26-ին շարունակվել է հայ գերիներ Դավիթ Դավթյանի և Գևորգ Սուջյանի շինծու գործով դատավարությունը, որոնց Ադրբեջանը մեղադրում է լրտեսության մեջ։ Ադրբեջանական APA գործակալությունը հայտնում է, որ այսօրվա նիստի ժամանակ դատախազն ընթերցել է մեղադրական եզրակացությունը, համաձայն որի՝ Դավիթ Դավթյանն ու Գևորգ Սուջյանն ապօրինաբար հատել են Ադրբեջանի սահմանը, ռազմական տեղեկություններ հավաքել ու դրանք փոխանցել Հայաստանի հատուկ ծառայություններին՝ զբաղվելով լրտեսությամբ։

Ադրբեջանական քարոզչամեքենան պնդում է, որ Դավթյանն ու Սուջյանը 2019 թվականին հավաքագրվել են Հայաստանի ազգային անվտանգության ծառայության կողմից։ 2020 թվականի սեպտեմբերին նրանք անցել են Արցախ, որտեղ «ուսումնասիրել են մարտական դիրքերը, մարտական գործողությունների տարբեր հատվածներում ադրբեջանական բանակի թվային կազմը, հավաքել տեղեկատվություն և դրանք փոխանցել հայկական հատուկ ծառայություններին»։ 

Հիշեցնենք, որ 2020 թվականի նոյեմբերին՝ Արցախում մարտական գործողությունների ավարտից հետո, հայտնի էր դարձել, որ Բերձոր-Շուշի ճանապարհին գերեվարվել են «Նոր Հայաստան Հայրենիք-Սփյուռք» բարեգործական ՀԿ-ի հիմնադիր նախագահ Գևորգ Սուջյանն ու նրա ընկերը՝ Դավիթ Դավթյանը։ Սուջյանը պատերազմի օրերին ընկերների հետ միասին օգնություն էր տեղափոխում Արցախ։ Դատավորը հայտարարել է, որ եթե հաստատվի մեղադրանքը, ապա Գևորգ Սուջյանը և Դավիթ Դավթյանը հնարավոր է՝ դատապարտվեն մինչև 15 տարվա ազատազրկման։ 

Դատարանում Սուջյանը հայտարարել է, որ Հայաստանում գործող «Նոր Հայաստան Հայրենիք-Սփյուռք» բարեգործական կազմակերպության ղեկավարն է։ «Պատերազմի սկզբում իմ ծանոթներն սկսեցին օգնություն տրամադրել։ Ես հավաքում էի դրանք, օգնում զինծառայողներին, Ստեփանակերտի բնակիչներին։ Ամեն ինչի մասին կիսվել եմ ֆեյսբուքյան իմ էջում։ Օգնություն էի հավաքում Գորիսում, ուղարկում Մարտունու զորամաս։ Այդ ժամանակ եկել էի Շուշի, որ աղոթեմ։ Այնտեղ լրագրողներին էլ հարցազրույց տվեցի, պատրաստեցի տեսանյութեր Ստեփանակերտում առկա իրավիճակի մասին և կիսվեցի սոցիալական ցանցերում»,- նշել է Գևորգ Սուջյանը։

Վերջինիս խոսքերով՝ նոյեմբերի 10-ին ստորագրված հայտարարության օրը որոշել է մեկնել Ստեփանակերտ, որպեսզի օգնություն հասցնի։ «Ժամը 11-ին Լաչինի միջանցքում մենք անցանք ռուս խաղաղապահների մոտով։ Մեր մեքենան ստուգեցին, այնուհետ թույլտվություն տվեցին։ Շարունակեցինք մեր ճանապարհը։ Մեկ էլ ճանապարհին ադրբեջանական դրոշ տեսանք ու կանգ առանք այնտեղ։ Այդ ժամանակ մեզ մոտեցան ադրբեջանցի զինծառայողներն ու ձերբակալեցին մեզ»,- հավելել է Սուջյանը։

Վերջինս նաև բացառել է իր կապը հայկական հատուկ ծառայությունների հետ՝ ընդգծելով, որ մարտական գործողությունների վայրում նկարվել է միայն մեկ անգամ՝ զենքը վերցնելով այլ զինծառայողից։

Դատարանում ընթերցվել է Սուջյանի ավելի վաղ տված ցուցմունքը, որտեղ, վերջինս, իբր, խոստովանել է, որ համագործակցում է Հայաստանի ԱԱԾ-ի հետ, իսկ նրան հավաքագրել է ոմն Արտակ։ APA գործակալությունը, մեջբերելով այն, գրում է, որ Գևորգ Սուջյանը սկսել է համագործակցել հայկական հատուկ ծառայությունների հետ, քանի որ խնդիրներ է ունեցել փողերի լվացման հետ կապված։ Նրա նկատմամբ սպառնացել են գործ հարուցել, որի պատճառով վերջինս դարձել է ԱԱԾ գործակալ։

Հիշեցնենք, որ այս շինծու գործով նախնական դատական նիստը կայացել էր հուլիսի 6-ին։

Լուսանկարը՝ Գևորգ Սուջյանի ֆեյսբուքյան էջից