Հայաստանի պաշտպանության նախարարությունն առաջարկում է զինված ուժերի գլխավոր շտաբում ստեղծել կառուցվածքային նոր ստորաբաժանում՝ տարածքային պաշտպանության և պահեստային ուժերի հրամանատարություն։ Կառավարության համապատասխան որոշման նախագիծը հանրային քննարկման է ներկայացվել իրավական ակտերի նախագծերի հրապարակման միասնական կայքում։

Պաշտպանական գերատեսչությունը ընդգծում է, որ նախագծի ընդունումը պայմանավորված է ՀՀ զինված ուժերի բարեփոխումների շրջանակներում իրականացվող կառուցվածքային փոփոխությունների իրացման անհրաժեշտությամբ:

Ըստ պաշտպանության նախարարության՝ նոր ստորաբաժանումը ստեղծվում է զորատեսակների կենտրոնացված ղեկավարման նպատակով, որը կիրականացնի տարածքային պաշտպանության կազմակերպման պլանավորումը, պետական ռազմական համակարգի մարմինների հետ համագործակցությունը, կցագրված պահեստազորային ռեսուրսների կառավարման, աշխարհազորային ստորաբաժանումների պատրաստության և ներդաշնակման կազմակերպման հարցերի համակարգման գործընթացը:

Ինչպես նշված է նախագծում, նոր կառուցվածքային ստորաբաժանման ստեղծման առթիվ զինված ուժերի թվակազմի ավելացում չի պլանավորվել, այն իրականացվելու է այլ ստորաբաժանումների հաստիքների կրճատման և պաշտպանության նախարարությանը հատկացված բյուջետային միջոցների հաշվին:

Հավելենք, որ պաշտպանության նախարարության այս նախաձեռնությունը դեռևս նախագծի կարգավիճակում է, և ուժի մեջ մկտնի միայն կառավարության հավանությանն արժանանալուց հետո։

Լուսանկարը՝ արխիվային / © «Հետք»