Ազգային ժողովի արտահերթ ընտրություններում «Ապագա կա» կարգախոսով հանդես եկած եւ խորհրդարանում մեծամասնություն կազմած «Քաղաքացիական պայմանագիր» խմբակցության պատգամավոր, գործարար Գուրգեն Արսենյանի ավագ որդին, ինչպես ասում է հենց ինքը՝ Արսենյանը, իր կյանքն ու գործունեությունն առայժմ կապում է ԱՄՆ-ի հետ:

Բաբկեն Արսենյանը 2018-ի սեպտեմբերին ընկերություններ է հիմնել Լոս Անջելեսում, սակայն հայրն ասում է, թե որդու տնտեսական գործունեության մանրամասներին չի տիրապետում: Ըստ Գ. Արսենյանի՝ որդին ԱՄՆ է տեղափոխվել զինծառայությունից եւ ամուսնանալուց (2016 թ.) հետո. կինը ԱՄՆ քաղաքացի է, Միացյալ Նահանգներում են ծնվել նաեւ պատգամավորի 2 թոռնուհիները:

«Դա Բաբկենի անձնական որոշումն է: Որոշեց իր կենսագործունեությունը շարունակել Միացյալ Նահանգներում, եւ կարծում եմ, որ հաջողությամբ է ընթանում իր՝ ԱՄՆ-ում տեղայնացվելու գործը: Իր կյանքի մոտակա հատվածը, գործունեությունն առայժմ կապում է ԱՄՆ-ում իրականացվող պրոցեսների հետ»,- «Հետքի» լրագրողին հայտնել է Գուրգեն Արսենյանը:

2018-ի սեպտեմբերի 13-ին Լոս Անջելեսի Էնսինո (Encino) թաղամասում Ջուլիետա Ուշակյանը, ով Բաբկեն Արսենյանի կինն է, գրանցել է «Arsn Enterprises» կորպորացիան: Արսենյանն է կազմակերպության գործադիր ու ֆինանսական ղեկավարը, նաեւ՝ քարտուղարը: Կորպորացիայի 2 տնօրենները ամուսիններն են: «Arsn Enterprises»-ի գործունեության տեսակը փաստաթղթերում նշված է «բիզնեսի կառավարում»:    

Հիմնադրումից օրեր անց՝ սեպտեմբերի 17-ին, նույն հասցեում (գրասենյակային տարածք է) Ջ. Ուշակյանը գրանցել է «Joushaki» կորպորացիան: Սրա գործադիր ու ֆինանսական ղեկավարը եւ քարտուղարը կրկին Բ. Արսենյանն է, ամուսինները կորպորացիայի տնօրեններն են: Գործունեության տեսակը նշված է «ներկրում, արտահանում, մանրածախ առեւտուր»:

Սրանք Բաբկեն Արսենյանի արտասահմանյան միակ ընկերությունները չեն: 2016-ի նոյեմբերին նա Չեխիայի մայրաքաղաք Պրահայում հիմնել է «Arsenian Investments» ՍՊԸ-ն, որի գործունեության ոլորտ են նշված առեւտուրն ու ծառայությունները: Պատգամավորի որդին 10 հազ. կրոն կապիտալով ընկերության միակ տնօրենն ու սեփականատերն է: «Arsenian Investments»-ի գրանցման հասցեն «հայկական» է, այստեղ հայ սեփականատերերի պատկանող մի շարք ընկերություններ են գրանցված, որոնցից մեկին նախկինում անդրադարձել ենք:

Բաբկեն Արսենյան

Բայց սա էլ ամենը չէ: Բաբկեն Արսենյանը Լոս Անջելեսի մեկ այլ թաղամասում՝ Ստուդիո Սիթիում (Studio City), ԱՁ է գրանցել, որը նախորդ տարվա հունիսին կորոնավիրուսի տնտեսական հետեւանքների չեզոքացման ծրագրերից մեկի (Paycheck Protection Program – աշխատավարձի պաշտպանության ծրագիր) շրջանակներում 20 հազ. դոլար վարկ է ստացել տեղական «Umpqua Bank»-ից: Այն նախատեսվել է 1 հոգու աշխատավարձ վճարելու համար: Ըստ ամենայնի, խոսքը հենց իր՝ անհատ ձեռներեց Բաբկեն Արսենյանի մասին է:

Բացի դրանից՝ տակավին վերջերս՝ օգոստոսի 4-ին, Բաբկեն Արսենյանը միանգամից 5 կորպորացիա է հիմնել, որոնք զբաղվում են հոսպիսային եւ տնային խնամքի ծառայությունների մատուցմամբ: Դրանցից մեկի՝ «Avicenna Hospice Care»-ի հասցեն Էնսինոյում է, այն նույն գրասենյակային շենքում, որտեղ գործում են «Arsn Enterprises» եւ «Joushaki» ընկերությունները: Մյուս չորսը Ստուդիո Սիթի թաղամասում են, մի բնակարանում, որը ներկայացված է նաեւ Բ. Արսենյանի կոնտակտային հասցե: Այդ կորպորացիաներն են՝ «Graceful Nursing Hospice Care», «Graceful Nursing Home Health Care», «Graceful Hands Home Health Care» եւ «Graceful Hands Hospice Care»: Նշված բոլոր ընկերությունների գործադիր ու ֆինանսական ղեկավարը, քարտուղարը եւ տնօրենը Բաբկեն Արսենյանն է: Նկատենք, որ վերջինս ՀՀ քաղաքացի է, ունի Երեւանի գրանցում:

Կարելի է ասել, որ որդին գնացել է հոր՝ Գուրգեն Արսենյանի հետքերով, ով եւս ժամանակին բիզնես հետաքրքրություններ ուներ ԱՄՆ-ում:

1996-ի հոկտեմբերի 1-ին Լոս Անջելեսի Վան Նայս (Van Nuys) թաղամասում հիմնադրվել էր «Alarco Trading» կորպորացիան, որի գործակալը (անձ, որը զբաղվում է ընկերության թղթաբանությամբ) Գուրգեն Արսենյանն էր: Դատելով անվանումից՝ ընկերությունն զբաղվել է առեւտրով: Այդուհանդերձ, 2000 թ. հարկային մարմինը կասեցրել է «Alarco Trading»-ի գրանցումը (FTB suspended), քանի որ վերջինս թերացել է հարկային պարտավորությունների կատարման մեջ:

1999-ի փետրվարի 2-ին էլ Գ. Արսենյանի գործընկեր Բորիս Արությունովը (Վան Նայսից) գրանցել է «Guapa Food Industries» ՍՊԸ-ն: Չնայած ընկերության մասնակիցների՝ Արությունովի ու Արսենյանի հասցեն եղել է Վան Նայսում, որպես ՍՊԸ-ի գործունեության հասցե նշվել է Կալիֆոռնիա նահանգի Կարսոն (Carson) քաղաքը: Գործունեության տեսակը եղել է սննդի արտադրությունն ու մատակարարումը: 2000 թ. դեկտեմբերին ընկերությունը փոխել է անունը՝ դառնալով «Absolute Foods»: ՍՊԸ-ի տնօրենը եղել է Բ. Արությունովը: Բայց այս ընկերության գործունեությունը եւս կասեցվել է (SOS/FTB suspended), ընդ որում՝ թե՛ նահանգի պետքարտուղարի (նահանգային պաշտոնյա, որը, ի թիվս այլ պարտականությունների, պահում է ընկերությունների վերաբերյալ փաստաթղթերը), թե՛ հարկային մարմնի կողմից, քանի որ ՍՊԸ-ն չի կատարել իր պարտավորությունները նրանց առաջ:     

«ԱՄՆ-ում 1990-ականների վերջերին իմ հիմնադրած ընկերության արդյունքներն անբավարար էին (ըստ էության, նկատի ունի «Absolute Foods» ՍՊԸ-ն – հեղ.), որովհետեւ ես չէի զբաղվում կառավարմամբ,- մեր լրագրողի հետ զրույցում ասել է ԱԺ պատգամավոր Գուրգեն Արսենյանը,- ամերիկյան գործընկերոջ ղեկավարման արդյունքում ունեցանք ոչ հաջող ավարտ: Ընկերությունը փակվեց, ու դրա ֆինանսատնտեսական գործունեությունը որպես այդպիսին բացասական էր»:

Ինչ վերաբերում է ամերիկյան բիզնեսի վերաբերյալ իր ներկա հետաքրքություններին, Արսենյանն ասել է. «Իմ հետաքրքությունը ամերիկյան համակարգերի նկատմամբ այս պահին սահմանափակվում է ֆինանսական ռեսուրսների որոշակի ներդրմամբ ամերիկյան ֆոնդային բորսաներում գնանշվող ընկերությունների արժեթղթերի մեջ»:

ԱԺ արտահերթ ընտրություններից առաջ պատգամավորի թեկնածու Գուրգեն Արսենյանը ՀՀ կենտրոնական ընտրական հանձնաժողովի առաջ բաժնեմաս է հայտարարագրել 7 ընկերություններում: Ըստ այդմ՝ նա 100 տոկոսի բաժնետեր է «Արսօյլ», «Յունիքորն Ֆլորա», «Յունիքորն Փրինթ», «Յունիքորն Քոնսթրաքշըն» եւ «Յունիքորն Գրուպ» ՓԲԸ-ներում, նաեւ միանձնյա փայատեր է «Յունիքորն Սերվիս» ՍՊԸ-ում: Բացի սրանցից՝ պաշտոնյան 13 տոկոս փայ ունի «Վկրեդիտ 24» ՍՊԸ-ում եւ 51 տոկոս փայ՝ «Էլդորադո-Արմեն» ՍՊԸ-ում:

Գ. Արսենյանի հայտարարագրած մնացած ունեցվածքի եւ եկամուտների մասին կարող եք կարդալ այստեղ: