![](/static/articles/13/51/32/l-mFQjIiRTUb.jpg)
Կապանի համայնքապետ. «Իշխանությունները Կապանը տարան ավագանու արտահերթ ընտրությունների, ուզում են ինձնից ազատվել»
Այս ամսվա սկզբին Կապանի ավագանու 15 անդաներից 8-ը հրաժարական են ներկայացրել: Ընդ որում՝ սկզբից վեցն էին ներկայացրել, օրեր անց՝ եւս երկուսը: Սա նշանակում է, որ առաջիկայում լինելու են ավագանու արտահերթ ընտրություններ, որոնք առաջին անգամ Կապանում անցկացվելու են համամասնական ընտրակարգով, ինչը ներկայում կիրառվում է Երեւանի, Գյումրու ու Վանաձորի համանքային ընտրություններում: Այսինքն՝ կապանցիները ընտրելու են տարբեր ուժերի, որոնք ընտրական շեմը հաղթահարելուց հետո ներկայացված են լինելու ավագանու կազմում, իսկ հետո ավագանու անդամները ընտրելու է համայնքի ղեկավարին:
Կապանի գործող համայնքապետ Գեւորգ Փարսյանը «Հետքի» հետ զրույցում ասում է, որ ավագանու անդամների՝ լիազորությունները վաղաժամկետ դադարեցնելն անսպասելի էր: Ըստ նրա՝ մինչ այդ տարաձայնություններ կամ խմորումներ չեն եղել ավագանու անդամների հետ, հակառակը՝ բոլորը ջերմ հարաբերություններ ունեին:
Համայնքապետը տեղյակ է ավագանու 8 անդամի հրաժարականի պատճառների մասին, սակայն դրանց չի ցանկանում անդրադառնալ՝ նշելով, թե ճիշտ է համարում, որ հենց նրանք հայտնեն իրենց հրաժարականի իրական պատճառների մասին:
Հարցին, թե ներկայում ինչ մթնոլորտ է Կապանի համայնքապետարանում, Գեւորգ Փարսյանը պատասխանում է՝ աշխատանքային նորմալ մթնոլորտ:
Անդրադառնալով հարցին, թե արդյոք 8 հոգու հրաժարականները դիտարկում է որպես սաբոտաժ իր նկատմամբ, Կապանի համայնքապետը պատասխանում է. «Սա պայմանավորում եմ նրանով, որ իշխանությունները Կապանը տարան ավագանու արտահերթ ընտրությունների եւ նման ձեւով ուզում են ինձնից ազատվել»:
Իր անձի նկատմամբ տրամադրվածությունը Փարսյանը կապում է պատերազմական եւ հետպատերազմական իրավիճակի հետ, մասնավորապես՝ նրա հետ, որ պատերազմից հետո ինքը հրապարակայնորեն հակաիշխանական դիրքորոշում է ունեցել:
-Ի՞նչ հարցերի շուրջ են եղել տարաձայնությունները իշխանությունների հետ, որ վերջիններս սկսեցին տրամադրվել Ձեր դեմ:
-Պատերազմից հետո տեղի ունեցան քաղաքական գործընթացներ, կար քաղաքական լուրջ ճգնաժամ։ Կապանում հանդես եկա խոսքով, որ քաղաքական ճգնաժամը լուծելու համար անհրաժեշտ է Նիկոլ Փաշինյանի հրաժարականը եւ երկրում արտահերթ խորհրդարանական ընտրությունների անցկացում։
-Այսինքն՝ Ձեր խոսքը Ձեր դեմ ուղղվե՞ց:
-Կարելի է նաեւ այդպես ասել:
-Սյունիքի համայնքապետների նկատմամբ քրեական գործեր հարուցվեցին, Ձեր դեմ քրգործ չեղավ, ի՞նչ եք կարծում:
-Փորձեր եղան, քրեական գործ հարուցելու նյութերը մերժվեցին, հիմք չկար:
-Իսկ քաղաքապետարանում ստուգումներ անցկացվեցի՞ն:
-Վերջին ստուգումները ՊՎԾ-ի կողմից կատարված ստուգումներն էին:
Եվ այսպես, Կապանն առաջիկայում պատրաստվելու է ավագանու արտահերթ ընտրությունների: Օգոստոսի 11-ին համայնքապետարանը արձանագրություն է կազմել ավագանու լիազորությունների վաղաժամկետ դադարեցման մասին, որն ուղարկվել է մարզպետարան: Փարսյանի փոխանցմամբ՝ օրենքով սահմանված կարգով որոշում պետք է կայացվի արտահերթ ընտրությունների վերաբերյալ:
Քվեարկության օրը դեռ հայտնի չէ: Համայնքի գործող ղեկավարը նշում է, որ ԿԸՀ-ն ՏԻՄ ընտրությունների համար 3 օր է առանձնացրել՝ հոկտեբերի 17, նոյեմբերի 14 եւ դեկտեմբերի 5:
Գեւորգ Փարսյանը գալիք ընտրություններում առաջադրելու է իր թեկնածությունը: Բայց եթե 2018-ի հոկտեմբերին, ինքնառաջադրվելով եւ լինելով անկուսակցական, նա հաղթեց գործող իշխանության թեկնածու, ՔՊ-ական, ներկայում Սյունիքի փոխմարզպետ Նարեկ Բաբայանին, ապա այս անգամ պետք է մասնակցի որեւէ քաղաքական ուժի կազմում: Թե որ ուժը կսատարի իրեն, Փարսյանը նշում է՝ լրացուցիչ կհայտարարի այդ մասին: Իսկ թե արդյոք ասպարեզում կան մրցակիցներ, ասում է, թե խոսակցությունների մակարդակով գիտի, որ շոշափվում է Ազգային ժողովի ՔՊ-ական պատգամավոր Դավիթ Դանիելյանի անունը:
Վերընտրվելու հնարավորությունների մասին հարցին Կապանի ներկա ղեկավարն ասում է, որ գնահատական տվողը քաղաքացիներն են:
Գեւորգ Փարսյանն ասում է, որ կիսատ շատ գործեր կան գրեթե բոլոր ոլորտներում ՝ քաղաքաշինության, կրթության, մշակույթի, սպորտի բնագավառներում, վերընտրվելու դեպքում շարունակելու է զբաղվել համայնքի՝ պարտադիր լուծում պահանջող խնդիրներով:
Կապանի ղեկավարի հետ զրուցել ենք նաեւ այս ամիս թշնամու կողմից Գորիս-Կապան ճանապարհը փակելու միջադեպի մասին:
-Պարոն Փարսյան, օգոստոսի 25-ին ադրբեջանցիները փակել էին Գորիս-Կապան ճանապարհի երկու հատված: Ինչի՞ արդյունքում բացվեց ճանապարհը, ի՞նչ քննարկվեց, ի՞նչ փոխհամաձայնություն ձեռք բերվեց:
-Երկու օր բանակցություններ ընթացան, որոնց մասնակցում էին ռուս սահմանապահների հրամանատարական կազմը եւ մեր ԱԱԾ-ի ներկայացուցիչները։ Վերջնարդյունքում եկան համաձյանության, եւ ճանապարհը բացվեց մի վերապահումով․ տեղադրվեցին բետոնե արգելապատնեշներ ռուս սահմանապահների հսկողության ներքո՝ երթեւեկությունը դանդաղեցնելու համար։ Երկու հատվածում բետոնե արգելապատնեշ է դրվել՝ Որոտանում եւ Նոր Առաջաձորում։ Այդտեղ տեղակայվելու են ռուս սահմանապահները, որոնք ճանապարհի այդ հատվածներում իրենց վերակարգերը, անձնակազմի թիվը մեծացնելու են, որ ամբողջովին ապահովեն անվտանգ երթեւեկությունը։
-Հիմա, Ձեր կարծիքով, անվտա՞նգ է երթեւեկելն այդտեղով:
-Ռուս սահմանապահները երեկվա դրությամբ ինձ երաշխավորեցին, որ այդ հատվածներում երթեւեկելն անվտանգ է։
-Իսկ օդանավակայանի մոտ ի՞նչ վիճակ է:
-Այդտեղ վիճակն անփոփոխ է:
Մեկնաբանել