ՀԱՊԿ-ը չի նախատեսում զորքեր մտցնել Աֆղանստան
Հավաքական անվտանգության պայմանագրի կազմակերպությունը վարում է պաշտպանական քաղաքականություն և չի նախատեսում զորքեր մտցնել Աֆղանստան։ Այդ մասին Мир 24 հեռուստաընկերության եթերում հայտարարել է ՀԱՊԿ գլխավոր քարտուղար Ստանիսլավ Զասը։
«Դա բացարձակ անհիմն մտավախություն է։ ՀԱՊԿ-ը բացառապես պաշտպանական ռազմաքաղաքական կազմակերպություն է։ Այն կարող է կիրառել կոլեկտիվ պաշտպանական ուժեր միայն ՀԱՊԿ պատասխանատվության գոտիներում»,- նշել է Զասը՝ պատասխանելով այն հարցին, թե արդյոք կազմակերպությունը պատրաստվում է զորքեր մտցնել Աֆղանստան։
«Թալիբան»-ը վերահսկողության տակ է վերցրել Աֆղանստանի տարածքի մեծ մասն այն բանից հետո, երբ ԱՄՆ-ն սկսել է իր զորքերը հանել Աֆղանստանի տարածքից։ Օգոստոսի 15-ին թալիբները իրենց վերահսկողության տակ էին առել նաև մայրաքաղաք Քաբուլը։ Նախագահ Աշրաֆ Ղանին լքել է երկիրը և գտնվում է Արաբական Միացյալ Էմիրություններում։
Լուսանկարը՝ РИА Новости / Михаил Воскресенский
Մեկնաբանել