Աֆղանները, որոնք «Թալիբան» արմատական շարժման իշխանության գալուց հետո ցանկանում են հեռանալ Աֆղանստանից, կկարողանան լքել այն՝ առևտրային թռիչքների վերականգնումից հետո և համապատասխան փաստաթղթերի առկայության պարագայում։ Այդ մասին հայտարարել է «Թալիբան» շարժման Քաթարի քաղաքական գրասենյակի ներկայացուցիչ Մոհամադ Սոհայիլ Շահինը՝ բրիտանական ITV հեռուստաընկերությանը տված հարցազրույցում։ 

«Ցանկացած աֆղան, որը մտադիր է մեկնել արտասահման և ունի անհրաժեշտ փաստաթղթեր (անձնագիր, վիզա), կարող է լքել երկիրը։ Բայց մենք նրանց կոչ ենք անում մնալ Աֆղանստանում։ Մենք անկախություն ենք ձեռք բերել։ Եկել է ժամանակը կառուցելու մեր երկիրը։ Նրանց կարողությունները և տաղանդները պետք են երկրի համար այսքան կարևոր ժամանակաշրջանում։ Սակայն եթե նրանք ցանկանում են մեկնել արտասահման, դա նրանց իրավունքն է»,- նշել է Շահինը։

Ավելի վաղ հայտնի էր դարձել, որ Աֆղանստանից շուրջ 200 բրիտանացիների և նրանց օժանդակած աֆղանների անվտանգ ելքի կազմակերպման հարցը Մեծ Բրիտանիայի վարչապետի Աֆղանստանի հարցերով հատուկ ներկայացուցիչ Սայմոն Հասը Դոհայում քննարկել է «Թալիբան» շարժման բարձրաստիճան անդամի հետ։

Արևմտյան երկրները օգոստոսի 31-ին ավարտել են Աֆղանստանից իրենց քաղաքացիների և նրանց հետ համագործակցած աֆղանների դուրսբերումն այդ երկրից։ Ընդորում, ԱՄՆ-ն և Մեծ Բրիտանիան բազմիցս թալիբներին կոչ են արել ապահովել աֆղանների իրավունքը անարգել լքելու երկիրը տարբեր անցակետերով, այդ թվում Քաբուլի օդանավակայանով։

Աֆղանստանում ամերիկյան ռազմական առաքելությունը շարունակվում էր 19 տարի և գրեթե 11 ամիս։ Ամերիկյան զորքերն այդ երկիր էին եկել «Ալ Քաիդա»-ի դեմ պայքարի համար, որը 2001 թվականի սեպտեմբերի 11-ին կազմակերպել էր Նյու Յորքի և Վաշինգտոնի ահաբեկչությունները։ 

Սա ԱՄՆ պատմության ամենաերկար պատերազմն էր, որի ընթացքում զոհվել է ավելի քան 2400 ամերիկացի զինծառայող։ Մոտ 20 հազարն էլ վիրավորվել է։ ԱՄՆ-ի համար առաքելության ընդհանուր արժեքը գնահատվում է մեկից մինչև ավելի քան երկու տրիլիոն դոլար։ 

ԱՄՆ-ն Աֆղանստանից իր զորքերի դուրսբերման մասին հայտարարել էր 2020 թվականին։ Մինչ գործընթացի ավարտն այդ երկրում իշխանության էր վերադարձել «Թալիբան» արմատական շարժումը, որը 1990-ականներից, մինչև ամերիկացիների գալը, կառավարում էր Աֆղանստանի մեծ մասը։ 

Համաձայն թալիբների հետ ամերիկյան համաձայնագրի՝ ԱՄՆ-ն պետք է ավարտեր իր զորքերի դուրսբերումը մինչև 2021 թվականի օգոստոսի 31-ը։

Լուսանկարը՝ Khwaja Tawfiq Sediqi/AP