Որոտանում ստեղծված վիճակը ԱԺ-ն դռնփակ կքննարկի
Խորհրդարանում հրավիրվելու է դռնփակ նիստ` Որոտանում ստեղծված իրավիճակի քննարկման օրակարգով: Երեկ «Հայաստան» խմբակցության պատգամավորները պահանջեցին Սյունիքում ստեղծված իրավիճակի հարցով հատուկ նիստ հրավիրել: ԱԺ նախագահ Ալեն Սիմոնյանը հայտնեց իր պատրաստակամությունը՝ նման քննարկում նախաձեռնելու: Այսօր արդեն «Հայաստան» խմբակցության քարտուղար Արծվիկ Մինասյանը հայտնեց` խորհրդարանական մեծամասնության hետ ձեռք բերված պայմանավորվածություն ունեն, որի համաձայն՝ նման քննարկում լինելու է:
«Առաջարկել ենք, որ առաջին դեմքերի մակարդակով քննարկում լինի, ներկա լինեն պաշտպանության և արտաքին գործերի նախարարները, ԱԱԾ տնօրենը, գլխավոր դատախազը, ՄԻՊ-ը և ՊԵԿ նախագահը: Շատ կարևոր է, որ ամբողջապես և լիարժեքորեն ստանանք տեղեկատվություն»,- ասաց Մինասյանը:
Ըստ ընդդիմադիր պատգամավորի` քննարկման հիմնական նպատակը պետության առջև ծառացած մարտահրավերները լուծել կարողանալն է, քանի որ երկրի տարածքային աբողջականությունը խախտված է:
«Այդ մասով պետք է քրեական գործ հարուցված լիներ, մենք սպասում ենք, որ գլխավոր դատախազն այս և նման հարցերին պատասխան տա, կամ ԱԳ նախարարն ասի իրանական կողմի հետ անհրաժեշտ աշխատանքներ տանո՞ւմ են, թե՞ ոչ, այդ տարածքների վերաբերյալ բանավոր կամ գրավոր պայմանավորվածություն եղե՞լ է, թե՞ ոչ»,- ասաց Մինասյանը:
Մինասյանի խոսքով` հանդիպման օրն ու ժամը դեռևս հստակեցված չէ, քանի որ «ԱԺ կանոնակարգ» սահմանադրական օրենքի համաձայն` հերթական նիստին զուգահեռ չի կարող այլ նիստ լինել, սակայն հստակ է, որ այն հնարավորինս հրատապ պետք է լինի:
Հիշեցնենք, որ ԱԱԾ-ն սեպտեմբերի 12-ին հայտարարություն էր տարածել, ըստ որի՝ Ադրբեջանի ոստիկանությունը Որոտան բնակավայրի մոտ իրանական բեռնատարների վարորդների փաստաթղթերն է ստուգում: Այս հայտարարությունից հետո իշխանության կողմից որևէ արձագանք չի եղել:
Մեկնաբանել