Սասուն Խաչատրյանը նշանակվեց Հակակոռուպցիոն կոմիտեի նախագահ՝ վեց տարի ժամկետով: Որոշումն ընդունվեց Կառավարության սեպտեմբերի 16-ի նիստում: Կառավարության մեկ այլ որոշմամբ՝ նա ազատվեց Հատուկ քննչական ծառայության պետի պաշտոնից:

Վարչապետի աշխատակազմի ղեկավար Արայիկ Հարությունյանը հայտնեց, որ 2021 թվականանին հուլիսի 1-ին ձևավորվել էր հակակոռուպցիոն կոմիտեի նախագահի ընտրության համար մրցութային խորհուրդ: Մրցույթին մասնակցելու հայտ են ներկայացրել Սասուն Խաչատրյանը, Գառնիկ Թորոսյանը և Դավիթ Մկրտումյանը: Սեպտեմբերի 10-ին տեղի է ունեցել Հակակոռուպցիոն կոմիտեի նախագահի համար հայտարարված մրցույթը, որտեղ առավելագույն միավորներ է հավաքել Սասուն Խաչատրյանը:

«Հակակոռուպցիոն մարմնի ստեղծումը մեր կառավարության առաջնահերթություններից է: Հիմա ստեղծում ենք մեկ միասնական մարմին: Վստահ եմ, որ ստեղծվող մարմինը կատարող աշխատանքներն առավել արդյունավետ է դարձնելու»,- իր խոսքում նշեց փոխվարչապետ Սուրեն Պապիկյանը:

Հակակոռուպցիոն կոմիտեի նոր նախագահն էլ նշեց, որ կառույցն, ըստ էության, լինելու է հատուկ մասնագիտացված քննչական մարմին, որն ունենալու է նաև օպերատիվ-հետախուզական գործառույթներ:

Ըստ Խաչատրյանի՝ կառույցը սկսելու է գործել առավելագույնը 1 ամիս 6 օրից: Այդ ընթացքում կնշանակվի 20 քննիչ, իսկ ամբողջ ծավալով ստորաբաժանումներ կսկսեն գործել հաջորդ տարվա սկզբից: Կառույցի համար հաջորդ տարի կստեղծվեն տարածքային մարմիններ:

Սասուն Խաչատրյանի կենսագրությունը

Ծնվել է 1976 թվականի նոյեմբերի 12-ին` Երևան քաղաքում:

1993 թվականին ընդունվել և 1998 թվականին գերազանցությամբ ավարտել է Երևանի պետական համալսարանի իրավաբանական ֆակուլտետը:

1998-2000թթ. ուսանել է ՀՀ ՆԳՆ բարձրագույն դպրոցի ասպիրանտուրայում, միաժամանակ` դասավանդել նույն ԲՈՒՀ-ում:

2000 թվականի մայիսից աշխատանքի է անցել ՀՀ դատախազության համակարգում` որպես Շենգավիթ համայնքի դատախազության քննիչ;

Լուսանկարը՝ Ֆոտոլուրի