Հայաստանի կառավարությունն առաջնորդվում է Առողջապահության համաշխարհային կազմակերպության (ԱՀԿ) ուղեցույցով, ըստ որի՝ կորոնավիրուսով վարակվելն և առողջանալը չի խոչնդոտում պատվաստմանը:

Այս մասին Ազգային ժողով-Կառավարություն հարցուպատասխանին ասաց առողջապահության նախարար Անահիտ Ավանեսյանը` արձագանքելով «Հայաստան» խմբակցության պատգամավոր Արեգնազ Մանուկյանի հարցին:

«Պատվաստումները մեզ պաշտպանում են նաև կրկնավարակից և շատ ավելի լայն իմունիտետային շերտ են ապահովում»,- ասաց Ավանեսյանը:

Պատգամավորը հետաքրքրվել էր, թե հնարավոր չէ արդյոք տարբերակ մտածել, ըստ որի բնական ճանապարհով հակամարմիններ ձևավորելու և համապատասխան փաստաթղթի առկայության դեպքում քաղաքացին ազատվի պատվաստվելու կամ թեստավորվելու պարտադրանքից:

Նախարարը նաև հավելեց, որ պատվաստանյութերի բավական լայն տեսականի կա, արդեն Հայաստանում է նաև «Մոդեռնա» ընկերության պատվաստանյութը, սպասվում են նաև այլ համալրումներ` վստահեցնելով, որ բոլորը բավարարում են որոշակի արդյունավետության չափանիշների:

«Էստեղ հարցն այն է, որ պետք է պատվաստումների ցուցանիշը բարելավել, ոչ թե տեսականին լայնացնել»,- ասաց Ավանեսյանը: